25 sano kadib Somaliland waxa ay gaadhay horumar dhaqan, dhaqaale, bulsheed, ganacsi iyo mid siyaasadeedba. Waxase jira in arrimo badan aanay noqon sidii laga filayay rubuc qarnigaas. Hannaanka doorasho ee loo doorto madaxda dalka waa mid aanay wali beelaha darafyadu si wacan u fahmin gaar ahaan Sool iyo Sanaag bari. Doorashada oo aan gaadhin meelahaas ayaa keentay in saamigii dadkaasi uu meesha ka maqnaado. Dhawrka xildhibaan ee is-xambaarkaa loo qaataana ma aha kuwo matala dadka deeganaadaasi.

Horumarinta dhaqaale iyo maalgashi ee dalku waa mid ay hortaagan yihiin caqabado dhexdeena ah oo badan. Dadka degan Somaliland qofwalba waxa uu yeeshay halkii uu yaallay; dawlad iyo cidkalena uma ogola in ay maalgashtaan. Sidoo kale waxa jira musuq ay dadku ka cabsi qabaan in khayraadka aanay waxba ka helin.

25 sano kadib dhalinyaradii dalkani ma hayaan niyad ay ku sii joogaan dalkan sababahan awgood:

Shaqo la,aan baahsan.

Rajo xumo.

Qabyaalad iyo maamul xumo.

Musuqmaasuq.

Qurbajoogta debedda oo hela saamiga ugu badan ee xilalka dalka iyo tixgelinta kale sida shaqada iyo ganacsiga.

Xagga maamulka sare ee dalka marka aynu eegno waxa muuqata in hal beel ay u badantahay, tusaale ahaan:

Madaxweynaha

Labada gole qaran

Guddoomiyaha Maxkamadda Sare

Guddoomiyayaasha saddexda xisbi qaran iyo musharixiintooda .

Badanka wasiirada xukuumadda gaar ahaan kuwa A-da iyo B-da ah.

Badanka xubnaha golayaasha qaranka.

Dhammaan xilalkan sarsare ee xaga sare aan ku qoray waxa ay ka soo jeedaan hal qoys. Marka ay sidan tahay sidee ayaynu dadkii kale ee dalka inala degenaa ugu qancin karnaa in aynu dawladda wada leenahay, sidee ayaynu u marsiin karnaa wax aynu inagu xamar ka diidnay. Dadka deegaanadan degan waa ay ogolaan karaan ka mid noqoshada saamilayda Jamhuuriyadda Somaliland haddii ay arkaan dedaallo la wado, se inta ay sidan saddexda habrood isu eryanayaan way adagtahay sida ay Somaliland u aqbalaan.

Dhibaatooyinkaas sare waxa soo raaca in dadka dega Somaliland aanay ka go,nay in ay banneeyaan kuraasta badan ee ay ku fadhiyaan si ay u samirsiiyaan walaalahooda wax tabanayaan.

Caqabadahan oo dhan waxa aan ku illaawaa nabadda iyo xasilloonida ay dadka dega Somaliland haystaan, taas oo aanay la wadaagin dadka ku nool Geeska Afrika.

Si kasta oo ay ahaataba, caqabadahan waa kuwo u baahan in la xalliyo, si loo dhammaystiro taabba galka dawladnimada curdinka ah ee Somaliland.

Allaa Mahad leh

WQ: Dr Jamaal Abdirahman Bullaale

Burco, Somaliland