Wasaaradda Arimaha Dibadda Xukuumadda Soomaaliya ayaa markii ugu horrasay shaacisay Dowladdii gacanta ka siisay bixinta kharashaadkii faraha badnaa ee ku baxay qareenadii Dowlada Federaalka Soomaaliya u qabsatay difaacidda Badda Soomaaliya ee Muranku kala dhaxeeyey dalka Kenya.

Wasiirka arrimaha dibadda xukuumadda Soomaaliya C/salaan Hadliye Cumar ayaa sheegay in Wasaarada Arimaha Dibadda ee uu masuulka ka yahay ay gacan weyn ka gaysatay keenista lacagtii ku baxday qareenadii Dowladda Soomaaliya u qabsatay difaaca kiiska dacwadad Badda Soomaaliya ee dhawaan ka dhacday Maxkamada ICJ.

C/salaan Hadliye ayaa caddeeyay in Dowladda Isu Tagga Imaaraadka Carabtu ay bixisay lacagtii ku baxday qareenadii Soomaaliya ku difaacayay kiiska Badda Soomaaliya, waxaana uu xusay in kiiskaasi ay ku baxday lacag aad u badan balse aanu sheegin cadadka ay tahay.
”Wasaaradda arrimaha dibadda ayaa lacagta qareenada Soomaaliya difaacayay keentay, waxaa lacagtaasi nasiiyay ugana mahad celinaynaa Dowlada Imaaraatka Carabta ”Ayuu yidhi Wasiirka Arrimaha Dibadda Soomaaliya.

 

Madaxweynaha Dalka Soomaaliya Xasan Sheekh Maxamuud ayaa dhawaan sidoo kale ammaanay Dowlada Imaaraadka Carabta oo uu sheegay in ay dowladda Soomaaliya wax badan ka caawisay ayna uga mahad celinayaan .