Gurmadaay. W/Q Khaalid Maxamed Cabdi.

0
Wednesday March 22, 2017 - 14:53:42 in by Super Admin
  • Visits: 265
  • (Rating 0.0/5 Stars) Total Votes: 0
  • 0 0
  • Share via Social Media

    Gurmadaay. W/Q Khaalid Maxamed Cabdi.

    Goobtaasi waxa ka jirtay xaalad dadnimo iyo bina aadannimo oo aad u liidata, bal sawiro qof aan cunno iyo biyo toonna haysan.

    Share on Twitter Share on facebook Share on Digg Share on Stumbleupon Share on Delicious Share on Google Plus

Goobtaasi waxa ka jirtay xaalad dadnimo iyo bina aadannimo oo aad u liidata, bal sawiro qof aan cunno iyo biyo toonna haysan.

Waxa ay ahayd barqo dheer, waa shalay subax; goor sheegtu waa abbaare 11kii. Waxa aannu ka baxnay Hargeysa anaga oo ku sii jeedna Arabsiyo oo illaa 35 KM noo jirta.

unnamed

 

Qorshahayagu waxa uu ahaa ka soo war helidda xaaladda qoysas duleedka magaaladaasi degey ayna isu keentay abaarta ba’an ee waddanka ka jirtaa.

Arabsiyo nabad qab ayaa aannu ku gaadhnay wakhti kooban ka dib. Waxa aannu magaalada uga baxnay dhanka galbeed oo ay noogu ballansanaayeen saddex booyadood oo middiiba qaaddo 50 foosto. Waxa aannu is kor taagnay ceelkii biyaha aannu uga qaadi lahayn dadkeennaa ooman, waa ceelka lagu magacaabo Agamsaha, waxana uu ku yaallaa dooxa Agamsaha oo u dhaxeeya Abaarso iyo Gebiley, waa ceel ay dadka deegaanku noo sheegeen in uu ka biyo macaanyahay ceelasha kale. Halkaasi ayaa aannu iska raacnay booyaddii koowaad oo kolkaasi buuxday, waxana aannu u dhaqaaqnay meel koonfur kaga beegan ceelkaasi aannu biyaha ka dhaaminay una jirta qiyaastii 5KM, waxa la yidhaahdaa deegaankaa Korjiga.

Goobtii markii aannu gaadhnay waxa aannu la kulannay wax aanu sheeko mooyee hore aanaan shaahid ugu arag, waa omos iyo biyo la’aan, harraad iyo dhanqalan, waxa goobtaasi wada deggen 31 qoys, qoyskiibana uu ka koobanyahay tiro dad ah. Qoysaskaasi oo ka ka la yimi deegaamadda Somaliland. Waa bari illaa koonfur, waqooyi illaa iyo galbeed, xuduudka itoobiya illaa iyo xeebta, waxa kale oo jira qoysas ay isu muuqdaan aan se goobtaasi la degenayn balse ay isku dan iyo duruuf yihiin.

Waxa meesha ka qodan barkad mug qaadkeedu yahay qiyaastii 300-400 oo foosto, dhibic biyo ahi se kuma jirto, dhoobada gunta barkadda taalaana waa qalayl aan engag ahayn, aynna muuqato kol aan sii fogayn in laga cabbay.

Barkadaasi waxa leh oo qotay oday deegaanka ah. Sida uu noo sheegay wakhtigii dalka la soo galay ayaa uu qotay sannadihii 1991kii illaa iyo 1992kii, isaga ayaa leh maanta se lama kala laha oo cidna kama xigo, maxaa uu ku falayaa kol haddii aanuu haynba dhibicdii cirka ee ay weelka u ahayd? Waxa kale oo meesha ahaa laba god oo aan dheerayn dhawaanna la qoday isla jeerkaasna shiraaq lagu riday si biyaha yagana loogu shubto, intuba se waa ay qalalanyihiin.

Dadka deegaanka soo dagay ee ka ka la yimi deegaamada kale waxa ay halkan soo bideen daaq iyo biyo balse maanta yaga iyo dadkii deegaanku waa ay simanyihiin oo labadiba waa gabaabsi, waxna la isma dhaamo e waa la simanyahay nin barkad lahaa, nin beer lahaa iyo nin soo guurayba.

Waxa aannu tuunbada ugu ridnay barkaddii oo biyihii booyadda koowaad ugu furnay. Illeen sibidhka sagxadda iyo hareeraha barkadda marsanba waa uu oomanyahay oo isaga ayaa u baahan biyo uu cabbo inta aanuu kayd kuu noqon!!!. Dhab ahaan ma sugi karaan dadkaasi biyuhu in ay barkadda ugu dhacaan oo ay wadaanta darsadaan e kolkiiba waxa ay maxasti la soo ordeen jirikaammo si ay ugu oon beelaan halka raggii qaar ka mid ahina ay gacanta kaga cabbeen tuunbaddii booyadda.

Nin ayaa hore u yidhi: "maxaa la iga ga farxi barriiba waa aan anban e” baraagtii biyo fiican waa ay ku dhaceen waana annu ku shubnay saddexdii booyadood maxaa se laga ga farxi bariba waa ay madhan e? Wallaahi waxa ay noo sheegeen in ay intaasi qoysaska kobta degen iyo kuwa kale ee soo arooraya ku filantahay uun illaa barri, halka qoysaska qaarna yaga oo aan soo gaadhin ay madhan doonto. Tolow haddii ay maanta iyo barri intaa cabbaan yaa u maqan sahan danbe ayaa aannu is waydiinay, Eebbe mooyee cid kale oo u maqanina in aanay jirin ayaa aannu isugu war celinay.

Goobtaasi waxa ka jirtay xaalad dadnimo iyo bina aadannimo oo aad u liidata, bal sawiro qof aan cunno iyo biyo toonna haysan. Goobtaasi oo kali ahna ma aha e meelo badan oo waddanka ah xaaladdu 100% ayaa ay ka liidataa, iska daa xoolo oo dadkii ayaa khatar ku jira oo inta carrabkooda candhuufi ku hadhay noloshii uga hadhsantahay.

Wax yaabaha aan aadka ula yaabay wax ka mid ah ceelkaasi aanu dadkaasi uga dhaaminay iyo booyadahaa noo qaadayba labadaba waxa dadkaa ooman ka xiga Hargeysa. Ceelku waa ceelka booyaduhu Hargeysa biyaha uga qaadaan, booyadahaa aannu kiraynayna waa booyadaha waraabiya xaafadaha Hargeysa. Dadkaa u jira 5 Km waa ay ka oomanyihiin halka dadka u jira 35 Km ay ka haqa beeleen!!! Kuwaa u dhaw oon ayaa ay ugu ag go’ayaan halka kuwan ka durugsan ay waddooyinka iyo guryaha hortooda qul-qulayaan!!!wax kale ma aha e yagu lacag ma haystaan ay biyo siistaan, mana goynayaan booyadaha, Hargeysi se waa ay haysataa, waana ay goynaysaa.

Eebbe waa uu ina waydiinayaa waana la ina ga la xisaabtamayaa dadkaasi aan maanta waxba hayn haddii aynaan gacan qaban oo u hurin moodkeenna si aynnu nafahooda u badbaadino. Haddii aan Eebbahay cayminna lagu jiri maayo sidaas e oonkaa iyo harraadkaa ayaa guryeheenna inoogu iman.

Dhallinyarada iyo cid kasta oo u istaagta in ay deegaankaa iyo deegaamada kale ee dalka ba wax gaadhsiiso waxa aan kula talin lahaa in aanay dadkaasi waxba u sii marin guddida abaaraha, waxa aan saa u leeyahay ma aha aaminid la’aan iyo xil gudasho la’aan, xaasha midna ma aha. Waxa aan u leeyahay waa: arrinkani ma aha arrin guddi e waa arrin qaran, ma aha xaalad ay la tacaali karayso gudidu waa se xaalad dhaaftay xuduudoodii, hawsha iyo culaysku waa ay ka tan badatay, waa arrin u baahan in qof waliba kaalintiisa ka qaato oo dalka bari, galbeed, koonfur iyo waqooyiba ay tahay in loo gurmado, taasi ayaana wax lagu wada qaban karaa mana aha in dusha laga daawado la na dhaliilo yaga oo aan wax ba hakranayn, waxa kale oo aan u leeyahay gabidda ay gabtay dawladdu kaalinteedii kaga aadanayd samato bixinta dadkeeda iyo ku eegidda ama ba ku kaliyaynt lagu kaliyeeyay masuuliyaddii saarnayd xukuumadda gudidda oo kali ah. Waxa kale oo aan u leeyahay dhallinyaradu haddii aanay hayn adduun buuran oo ay dadkooda ku caawiyaan waa in ay ugu deeqaan wakhtigooda, xoogoodda iyo maskaxdoodaba, yaga ayaa khibrad ka helaya kana korodhsanaya waayo arragnimo oo haddana ogaanaya xaaladda dadkoodu ku suganyihiin isla markaana ka helaya raalli ahaansho iyo abaal marin Eebbe.

Ugu danbayn deeqdaasi ma ay ahayn wax aannu annagu jeebkayaga ka bixinnay balse waa dhaqaale naga soo gaadhay dhallinyaro ku nool waddamada carabta oo bilaabay olole ay ugu magac dareen "ومن احياها” soomaali ahaanna la yidhaabdo NOOLEEYE. waa olole bilaw ah oo ay intaasi balaysin u ahayd, annaguna aannu kala shaqaynayno ka hirgalinta waddanka diyaarna aannu u nahay in aannu wax kasta u hurno, wakhti, xoog, hanti iyo maskaxba. Ololahaasi waxa uu leeyahay xisaabaad caalami ah oo ka furan Gofundme waana: https://www.gofundme.com/waman-ahyaha1

Aan u mahad celiyo gudidda abaaraha ee heer qaran, heer gobol iyo heer degmo ba oo yagu hagayaal noo ahaa nana tilmaamay isla jeerkaasna na jiheeyay. Eebbe ha idinka abaaliyo.

Waxa aannu diyaar u nahay in aannu ka caawinno cidkasta oo danaynaysa in ay walaalahood wax gaadhsiiyaan.

Haddii aad jeceshahay in aad ololaha qayb ka noqoto adiga oo dalka gudihiisa jooga waxa aad ku hagaajin kartaa Zaad= 0634444330 eDahab= 659999323.

Aan ku soo gunaanado qoraalka tuducyo ka mid ah maansada Guubaabo ee Hal-abuur Xasan Daahir Ismaaciil "Weedhsame”

"Saddex goor haddii aad gasiin gawska la helayso,
Haddaad midhaha geedaha ku yaal gurato hoobaanta,
Haddaad guri dugsoon jiifto iyo ila-xidh kuu gaara,
Haddii goolal kuu looggan yiin dheregna goohayso,
Way galangalcoobiin dadkii kugu geddaanaaye,
Goonyahaaga baahida jirtaa waa mid ganac weyne,
Giriyaad harraad baa ku dilay gabanadeeniiye,
Hooyada sidii awr gurgura guudka ubad saartay,
Ee socodka goobyaalaysee qaydku kala gooyey,
Ee goror biyo ah haysanee luunka lagu gaadhay,
Ee weliba gabankay siddaa hooyo garow leeyey,
Bal is gee halkay taagan tahay maanka uga kuurgal,
Bal dareen waxay geydh qabtiyo gahangahaa haysta,
Uma waayin guullaha ilaah gaawe iyo soore,
Aduu garashadaa eegayaa gaalka inad dhaanto.

Marka godol la waayee nafluhu baahi golosoobo,
Marka guga hillaacaa biyaha gorora kuu diido,
Galool damal ahaa maalintuu xididka soo goosto,
Marka guruxu deymada ka rogo ciidda gubanaysa,
Guunyada nin laa maalintuu goob xun kaga baydho,
Gebogebo dadkoo yuururoo geer u geli waayey,
Haddii geedi loo raro baryoo guulle lagu eerto,
Deeqdiisa gaaxsani rabbay gaajo bixisaaye,
Allahaan gef aadmiga ku qadin qadafka uu geysto,
Allahaan addoomaha gummayn gacanta hoos haysta,
Isagaa gufayn kara docdaan hararku gaadhayne,
Go’a madhan raxmaan baan u dhigay gumaradiisii.

Adigaa ninkaad gaadh u tahay guluf aan jiidhayne,
Adigaa ninkaad gawdhisaa gabageboobaaye,
Adigaa ninkaad guusha siin tiisu gudubtaaye,
Adigaa ninkaad gaax tirtana gaajo solotaaye,
Adaan geedna kaa qarin qalbiga xaalka gubayaaye,
Inkastuu gabbood falo nafluhu gu iyo jiilaalba,
Guullaha dul-qaataad tahee oon ha nagu goynin,
Gargaariyo raxmaan baad tahee cayn hanagu giijin,
Gacmihii madhnaa baan wadhnee maanta nagu goobo,
Abaaruhu gefkeenii batiyo galabsi weeyaane
Goortaan dulmiga gaaxsanaa guurtay dhibicdiiye
Rabboow gamashi baan taaganee roobka nagu guud fur” Aamiin. Aamiin.

#NOOLEEYE
#GURMADAAY

W/Q Khaalid Maxamed Cabdi.
Email: khaalid.mc@gmail.com