Golaha Ammaanka ee Qaramada Midoobay ayaa si xooggan ugu cambaareeyay Kuuriyada Waqooyi inay sameysay wax uu goluhu ugu yeeray tijaabo gantaal oo daan-daansi ah.

Kaddib kulan degdeg ah oo ay isugu yimaadeen Goluhu ayaa Mareykanka, Shiinaha iyo Ruushka waxa ay ku mideeyeen mowqifkooda ku aaddan saaruukha ay Kuuriyada Waqooyi dulmarisay jasiiradda Hokkaido ee dalka Japan.

Balse bayaanka Golaha Ammaanka laguma soo hadal qaadin cunaqabateyn dheeraad ah oo lagu soo rogo Kuuriyada Waqooyi.

Madaxa haatan ee Golaha Ammaanka, safiirka u fadhiya Ethiopia Qaramada MidoobayTekeda Alemu, ayaa aqriyay bayaanka sida wadajirka ah ay Goluhu usoo saareen.

Golaha Ammaanka ee Qaramada Midoobay waxa uu ku adkeeyay dhammaan dowladaha xubnaha ka ah golaha inay si buuxda oo degdeg ah u dhaqan galiyaan dhamaan qaraarada golaha.

Sidoo kalena Golaha Ammaanku waxa uu xoojiyay in ay muhiim tahay in Kuuriyada Waqooyi ay si degdeg ah oo daacad ah u fuliso tallaabada ah in ay hubkeeda nuyuuklerka ka tanaasusho iyada oo qaadeyso tallaabooyin muuqda sidoo kalena ka shaqeynta yareynta xiisada ka taagan gacanka jasiirada Korea.

Safriika Ruushka ee Qarmaada Midoobay, Vasilly Nebenzia, oo ka hadlay kulanka ayaa sheegay in diblomaasiyadu tahay wadada kaliya ee lagu xalin karo xiisada Kuuriyada Waqooyi.