Milkiila shirkadda Facebook, Mark Zuckerberg ayaa sheegaya in shirkaddiisu baarayaasha Mareykanka ee baaritaanka ku wada faragelin la sheegay in Ruushku uu ku sameeyay doorashadii Mareykanka ee 2016 ay la wadaagi doonto 3,000 oo xayaysiis siyaasadeed oo lala xiriirinayo Ruushka.

Waxa uu sidoo kale ballan qaaday in mustaqbalka uu xayaysiisyada siyaasadeed ee lagu faafiyo Facebook ka dhigi doono kuwa aan qarsooneyn.

Mark Zuckerberg ayaa sheegay in xayaysiisyada siyaasadeed la soo raacin doono afeef muujineyso ciida ama shirkadda dhaqaalaha ku bixisay.

Waxa uu intaasi ku daray in shirkaddiisu ay baaritaan ku sameyn doonto waddamada Ruushka iyo kuwo kale ee ka tirsanaan jiray midowgii soofiyeed oo si xun u isticmaalay xayaysiisyada ay baahiso Facebook.

Go’aanka shirkaddani Facebook ay xogta kula wadaageyso baarayaasha Mareykanka ayaa timi kaddib cadaadis badan oo ay kala kulantay shacabka, waxaana hadda loo arkaa in shirkadda ay gaashaamaneyso in mustaqbalka ay dhibaato ka soo gaarto sharciyada Mareykanka.

Horraantii bishan, waxaa la shaaciyay in xayaysiisyo siyaasadeed lagu bartilmaameedsaday codbixiyeyaasha Mareykanka, waxaana shirkadda Facebook ay rumeysan tahay in xayaysiisyadaasi ay kharash ku bixiyeen jilaayaal Ruushka u dhashay oo xiriir la leh madaxtooyada Ruushka.

Lahaanshaha sawirkaAFP/GETTY

Xayaysiisyadaasi laguma taageerin musharax khaas ah sida ay sheegtay shirkadda Facebook balse waxaa lagu faafinayay macluumaad xammaasad abuurayo sida arrimaha muhaajiriinta.

Shirkadda Facebook waxay sheegtay in macluumaadka ku saabsan xayaysiisyadaas ay la wadaagi doonto saraakiisha baaraya suurtagalnimada in Ruushku uu farogelin ku sameeyay doorashadii madaxtinnimada ee Mareykanka ee saandkii 2016-ka.

Doorashadaas oo Donald Trump uu ku soo baxay ayaa waxaa hareeyay eedeymo iyo tuhun ah in uu xiriir dhow la leeyahay madaxweynaha Ruushka Vladimir Putin.

Afhayeen u hadlay madaxtooyada Ruushka, Dimitry Peskov ayaa horraantii bishan sheegay in dalkiisa uusan wax lug ah ku lahayn xayaysiisyadaasi.

Dhanka kale, milkiilaha shirkadda Facebook, Mark Zuckerberg, ayaa sheegay in shirkaddiisu ay ka shaqeynayso sidii ay u ilaalin lahayd hufnaanta doorashada soo socota ee dalka Jarmalka, iyadoo durbaba tallaabooyin adag laga qaaday bogag been abuur ah oo gaaray kumannaan.