Waa makhaayad yar oo sandaqad ah oo dhulkii wax ka sareeya aanay jirin, macnihii marmar iyo sibidh toona midna ma leh oo dhulka si aan boodh uga kicin biyaha lagu rushaynaya, waxa makhaayada leh Xabashi oo cunto Itoobiyaan ku samaysa.

Sida aynu ognahay meheradaha imika waa la casriyeeyaa oo qurxin baa lagu sameeyaa (Decoration), haseyeeshee tani way cusub tahoo wali dhaqaalaha wax lagu qurxinayo may gaadhin.

Makhaayadaas yar ee aan sawirka guud ka muujiyey waxaan si kadis ah ugu arkay wasiir ka tirsanaan jirey xukuumaddii Siilaanyo iyo xukuumaddii Rayaale oo makhaayad yar ee Itoobiyaan ah ka cuntaynaya.

Anigoo la socda inamo aanu

asxaab nahay oo hortaagan makhaayadda waxaanu aragnay wasiirkaasi oo sii galaya meheradan, waan u qaadan waayey in wasiir makhaayada noocan oo kale ah ka cunteeyo,aniga iyo inamadii aanu wada soconay waxaanu la soo galnay makhaayadii si aanu wasiirka ula sheekaysano oo wax ka ogaano sababta makhaayadan wax uga cunayo maadaama oo aynu naqaano madaxda wadankeenu halka ay wax ka cunaan iyo meelaha ay ku nastaan heerka ay ka taagan yihiin nolosha caadiga ah, waxaan dalbaday canjeero itoobiyaan oo uu isna cunayo intii aan qadadda sugaynay baan sheekaysanay oo aan waydiiyey bal ka waran isbedelka dhacay iyo dalku sida uu yahay anigoo wali la yaaban sababta uu makhayadan dhuumo dharaga loo yaqaan ee dadka danyarta ahi wax uga cunaan uu wasiirkaasi wax uga cunayo, anagoo tuhmaya inay xoolihii umadani ku maqan tahay oo isna badhkiisa cunnay, waxaanu sheekadii na dhexmaraysay kolba su’aal dhex gallinayey si xog badan uga helo wasiirka.
Isagoo ka jawaabaya su’aashii aan waydiiyey ee isbedelka wadanka jira iyo sida uu arko waxa uu yidhi " waayaha jira waxaad ka garataa halka aynu maanta fadhino ee aynu ka qaadanayno shalayna saddexda wakhti waxaan wax ka cuni jirey hoteeladda waaweyn ee Maansoor, maantanna makhaayad yar ee Itoobiyaanka ah baan cunto ka cunayaa shalayna dhaylaan ka cun jirey”ayuu yidhi wasiirkaasi hore oo aanan jeclayn inaan magaciisa sheego.

Hadalka wasiirka anigoo tixraacaya waxaan waydiiyey sababta shalay dhaylo ugu guraacanayey maantana hoteel miskiinka uga qadaynayo, waxa uu igu jawaabay hadal run ah oo wax badan ka korodhsan kartid, waxaanu yidhi "dee shalay waxaanu cunaynay lacagtii dawladda imika nin waliba jeebkiisa ayuu isticmaalaya”

Macnihii xoolihii shalay hoteeladda waaweyn aan ku cunayey xoolo si dhib yar igu soo gasho ayey ahayd oo xoolo dawladeed ah balse imika wax aan leeyahay baan cunaaya oo waan lecjeclaynayaa ayaa iga soo baxay hadalkiisa.

Waa runtii oo waxaynu hoteeladda ku arki jirnay wasiir illaa agaasime waaxeed hoteelada Buug ku leh oo lagu qoro waxa uu ka cunayo isaga iyo asxaabtiisa oo hadhow wasaaradda uun lagu soo dallacayo, waxan xasuustay niman agaasime waaxeeddo oo si fiican u aqaanno oo hoteeladda buugta ku lahaa oo qaar badan oo aan asxaab ahayn maalin walba ka nusasaaceen jireen oo asaagimahaasi lagu qori jirey isna wasaaradda ku qori jirey.

Sidoo kale waxa gaadiidka magaalada dhex socdaa 60% waxa ay isticmaali jireen waa shiidaalka dawladda oo nin waliba nin buu ku xidhnaa oo uu shidaal ka qaadan jirey.

Nasiibdaro iyo nasiib wanaag hadba tay noqotaba dhamaan wixii oo dhan waa la joojiyey oo xukuumadan cusubi wixii kharashaad ku bixi jirey ee shaxaad haday tahay, haday shiidaal tahay iyo haday hoteelo wax laga cunaba tahay waa la joojiyey taasina waxay keentay in suuqii wixii soo gali jirey yaraado ka dibna busaarad badan laga cawdo oo hoteeladdii qaarkood qarka u saaran yihiin inay xidhmaan.

Mid ka mid ah shaqaalaha hoteelada waaweyn oo aan sheekaysanay waxa uu ii sheegay in shaqaalihii hoteeladda waaweyn wax ay qabtaan aanay jirin oo intii hore in laga dhimo la rajaynayo hadii aanay wax is bedelin, waxaanu ii sheegay qiso dhexmartay shaqaalaha iyo mulkiilihii hoteelada waxaanu yidhi "waxa jirtay maalin buu arkay ninkii hoteelka lihii anago hoteelka iska dhex taagtaagan oo aanan waxba qabanayn, hoteelku wuu camirnaan jirey oo dadka la kala hori jirey, waxa uu yidhi waar ma sidan baad u faro badnaydeen oo awal ma dadka in kala qarin jirey maanta uun baan arkay inaad badan tihiin”

Hadana waxa uu ku celiyey "waar ninkan aynu dooranay ma anagu na kicinayey sookan wasiiradii wax naga cuni jirey ee dadka casuumi jirtay ka joojiyey ..”

Waxa jirta in hoteeladii sidii waayadii hore u camirnayn, waxaana camiri jirtay madaxda kala duwan ee heer wasiir ilaa heer agaasime waaxeed oo mid walba kooxdiisa iyo reerkiisa ku casuumi jirey ka dibna lagu soo dalaci jiray dawlada, haseyeeshee hadda ma jirto wasiir cid casuumaya iyo mid wasaaradiisa ku qoraya waayo amar xaga sare ka yimid ayaa ah in qofka hoteel wax uu ka cunay ama uu dad ku casuumay lagu so reebi Karin wasaaradiisa ee uu jeebkiisa ka bixiyo, taas ayaa keentay in wasiirna waxba casuumin si shaqadiisa u ilaashado waa intaaso oo madaxweynaha la gaadhsiiya isagoo wasaaradda ku soo dallacay.

By:Barkhad-ladiif M. Cumar