Madaxweynaha dalka Fransiiska, Emmanuel Macron ayaa ku hanjabay inuu duqeyn doono Suuriya haddii ay caddaato wararka sheegaya in xukuumadda Dimishiq ay dadka rayidka ah u adeegsatay hubka kiimikada.

” Waan duqeyn doonaa goobaha lagu farsameeyo ama laga soo abaabulo hubka kiimikada” waxaa sidaasi yiri madaxweyne Macron.

Madaxweynaha Fransiiska ayaa sidookale sheegay in sirdoonka Fransiiska aysan ilaa iyo imika helin cadeymo muujinaya in dowladda Suuriya ay adeegsatay hub kiimika ah.

Hadalka hogaamiyaha Fransiiska ayaa imanaya xili bishii Janaayo ee sannadkii aynu soo dhaafnay ay soo baxeen warar sheegaya in dowladda uu hogaamiyo madaxweyne Bashar Al- Asad looga shakiyay inay adeegstaay hubka wax gumaada.

Sagaal qof oo uu naqaska ku dhegay ayaa lagu daweeyay cisbital ku yaala Suuriya, kadib markii bam la rumeesanyahay in laga sameeyay hubka kiimikada lagu duqeeyay magaalo ay maamulaan mucaaradka Suuriya horaantii bishan.

Mucaaradka dalkaasi ayaa dhankooda sheegay in diyaaradaha sida qumaatiga u kaca ee dowladda ay bam ku garaceen magaalada Saraqeb ee ku taala waqooyiga galbeed ee gobolka Idlib, balse dowladda Suuriya ayaa beenisay eedeymaha sheegaya in dad rayid ah ay u adeegsatay hub kiimika ah, waxaana ay intaa ku dartay in aysan bartilmaameedsanin dadka rayidka ah.

Mar uu ka hadlayaya magaalada Paris ee dalka Fransiiska ayaa maadxweynaha dalkaasi waxaa uu hoosta ka xariiqay sida dowladdiisa aysan wax dulqaad ah ugu heynin adeegsiga hubka kiimikada.

Madaxweyne Macron ayaa waxaa kale oo uu sheegay in ahmiyadda koowaad ay tahay dagaalka ka dhanka ah argagixisada, balse hadii la xaqiijiyo tallaabadan la sheegay in dowladda Suuriya ay ku dhaqaaqday uu Fransiiska qaadi doono tallaabo milateri oo ka dhan ah arrintaasi.

Sannadkii aynu soo dhaafnay madaxweynaha Fransiiska ayaa dhigiisa Ruushka u sheegay in adeegsiga hubka kiimikada ee gudaha dalka Suuriya ay tahay mid Fransiiska uu meel adag ka taaganyahay, haddii ay dhacdana uu jawaab degdeg ah ka bixin doono.

Macron oo jimcihii aynu soo dhafnay khadka taleefonka kula xiriiray Vladmir Putin ayaa waxaa uu ku wargeliyay walaaca dowladiisu ay ka qabto suurtagalnimada ah in dad rayid ah loo adeegsaday hubka wax gumaada.

Sannadkii 2013-ka ayay aheyd markii weerar loo adeegsdaay hubka kiimikada uu ka dhacay meel u dhaw caasimadda Dimqishiq, xiligaasi oo dolwdaha Mareykanka iyo Ruushka ay ku heshiyeen qorshe lagu burburinayo keydka hubka kiimikada muddo sanad ah, balse hey’adda ka hortagga adeegsiga hubka kiimikada ayaa diiwana gelisay in gudaha dalka Suuriya lagu adeegsaday hubkaasi.

Lahaanshaha sawirkaAFPImage captionDad naqaska ku dheganyahay

Bishii Apriil ee sannadkii hore, weerar lagu qadaay magaalo ay maamulaan mucaaradka Suuriya oo lagu magacaabo Sheikhoun ayaa waxaa ku dhintay boqolaal qof oo lagu arkay callaamado muujinaya in hubka kiimikada lagu weeraray.

Dad goobjoogayaal ah ayaa sheegay inay arkeen diyaarado dagaal oo weeraraya magaalada, waxaan xiligaasi soo shaac baxay muuqaalo muujinaya dad u badan caruur oo ay waxyeelo ka soo gaartay weerarka, kuwaa oo abur kasii deynaya afka. Inkabadan sideetan caruur ah ayaana ku dhimatay weerarka.

Madaxweynaha Suuriya Bashar al-Assad iyo iyo dowladda ay xulafada yihiin ee Ruushku waxaa ay ku celceliyeen in arrintaasi ay tahay mid aan waxba ka jirin, iyadoo na dowladda Suuriya ay intaa ku dartay inay bartilmaameedsatay oo keliya haamo ay leeyihiin mucaaradka oo ay kujiraan hub kiimika ah.