Todoba iyo labaatan qof oo rayid ah ayaa lagu soo waramayaa in lagu dilay dagaallo rogaal celis ah ka dhacay Suuriya oo lagu dirirayo gacan ku haynta magaaladii ugu dambaysay ee ay fallaagadu haystaan oo ku taal dhinaca bari ee magaalada Dimishiq.

Ururka la socodka gabood fallada xuquuqda aadanaha Suuriye ee fadhigiisu yahay Ingiriiska, ayaa sheegay in magaalada Duuma duqayn cirka ah lagu hayo.

Mudo sanado ah ayay falaagadu gacanta ku hayeen dhulka ku dhaw magaalada Dimishiq oo ah deegaanka loo yaqaan bariga Quudah. Laakiin dhawaan ayaa ciidadama dawladdu dib u qabsadeen dhulkaa badankiisa.

Magaalada keliya ee ku hadhay gacanta fallaagada ayaa ah Duuma oo ay haystaan koox lagu sheego Jaysh Al-Islam.

Waxaanay u dhawdahay in ay ku gacan saydhay heshiis dhawaan la gaadhay oo ay kaga bixi lahaayeen magaalada loona banneeyey marin nabadoon oo ay ku gaadhayaan dhulka mucaaradku gacanta ku hayo ee woqooyiga Suuriya. Ilaa haatan se waxa arrintu u muuqataa in wada xaajoodyadii fashilmeen, Duumana weerar ayaa ku socda.