QIIMAHA CADAALADA.. WQ: Abdifatah Basher Hassan
QIIMAHA CADAALADA
Hordhac
Allaah ayaa mahad oo dhan iska leh, nabadgalyo iyo
naxariisina Nabigeena Muxammad ah korkiisa ha ahaato waxaan kaloo umahd
celinayaa saxaafada somaliland.
Diinta islaamka Cadaalada waxa ay kaga jirtaa door
muhiim ah Waa mowduuc aad u weyn oo xiriir la yeelanaya dhaqaalaha, bulshada,
hogaanka iwm. waxaana lagu sheegay quraanka & sunaha sidoo kale waxaa jira
aayado iyo xadiisyo badan oo kusoo arooray
in cadaaladu tahay shay muhiim ah u ah dhismaha/jiritaanka shaqsiyadeed, qoyseed
& Midka qowmiyadeedba.
Fikrada cadaalada waxa ay la
xiriirtaa sinaanta xaqa iyo runta iyadoo aan la isku kala saareynin sababo la
xiriiro midab, dhalasho ama mararka qaar diin. Cadaaladu makala laha
sareyn, nasab, hanti ama sharaf waa mid ay tahay in loo wada sinaado shaqsi
walbana ay qabato si isku mid ah.
Cadaalad in la bixiyo waa mid ka mid ah asbaabaha
ay u taagnaan karto dowlad islaam ah hadiise la waayo waxaa la waayi madaxda
iyo dowladaa sidii loo waayay Qadaafi iyo Xusni Mubarak. Mararka qaar waxaa
dhacda dunida in cadaalada aanan la helin in badan sidoo kalana in cadaalada
aysan helin dadkii mudnaa tusaale ahaan inaan si saxan bulshada xoolaheedi ama
xaqeedi loogu maamulin.
Cadaaladu waa waajib. Erey ahaana cadaalad
micnaheedu waa isku dheelitirnaan. Sida aan kasoo xiganaayo Cimlaaqi aqooneed
ee masaariga ahaa Dr. Sayyid qutb wuxuu yiri cadaalada bulshadeed waxa ay ka
kooban tahay seddex sheey:
1) In qofka xurnimo dhameystiran u lahaado
dareenkiisa/keeda.
2) In bani’aadmigu sinaado {Waxyaalaha Qaar}
3) Isku xirnaanta bulshada taasoo micnaheedu yahay
kasoo bixida masuuliyada bulshadeed micnaheeduna ma aha dareen ahaan ee waa
qaadida ficilo dhab ah sida bixinta zakada Hadiise ay jirto in ay baahida
bulshada kaafin weydo waa in lacag dheeri ah laga qaadaa dadka wax heysta.
Nabigeena Maxamad {NNKH} wuxuu yiri todobada qof ee
aakhiro hadhka ilaaheey hadhsanaya waxaa ku jira shaqsi u cadaalad falay dadkii
uu xukumayay. Waxaa markaa muhiim ah in cadaalad darada laga fogaado. Cadaalada
waxeey keentaa nabada, Midnimada, horumarka dhinacyadiisa kala duwan xag
buslsho, xag Aaqooneed, dhaqan dhaqaale & ilbaxnimo. Gardarada iyo isbidida
awooda ee koox, Qabiil ama reer isbidaan kuna dulmiyaan kuwo kale ayaa waxa ay
cadaalad daro soo jireen ka aheyd soomaalida in badan. Cadaaladu wax walba ayey
soo galeeysaa oo ay ka mid yihiin:
HogaankaQofka wax xukumaya iyo cadaalada
Shaqsigaa wax xukumaya waxuu noqon karaa
madaxweyne, Qareen maxkamadeed ama qof mudan sida oday dhaqameed oo gar goynaya
ama looga fadhiyo sameynta cadaalada waxaa qasab ah in go’aankaa la mariyo
cadaalada. Ilaaheey wuxuu jecel yahay quraankana ku yiri dadka cadaalada
sameeyo hadii ay waxa ay xukminayaan haku saleeyeen cadaalada. Sidoo kale qofka
furaya marqaati hadaladiisa haku saleeyo run iyo sida dhabta ah ee wax u
jiraan.
Dhexdhexaadinta bulsho iyo Cadaalada
Waxaa sidoo kale muhiim ah in cadaalada ay noqoto
aalad la adeegsado marka bulsho la dhexdhexaadinayo gaar ahaan bulsho burburtay
oo arinteedu murugsan tahay waxaa lagama maarmaan ah in adeegsiga cadaalada ay
wax badan soo dhiseyso. Dhexdhexaadintaa ayaa waxeey noqon kartaa labbo koox oo
dagaalamay, Labo qabiil oo colaadi dhexmartay, Ninki & xaaskiisa, labbo
dowladood oo dagaalamay waxaa waajib ah in cadaalad laga sameeyo dhamaan.
Wadaagida, U sinaanta Fursadaha, iyo ilaha
dhaqaale ee dalka
Fursadaha shaqo, waxbarasho, dalacsiin, adeeg,
taakuleyn iyo in kale oo badanba waxaa bulshadu ay u baahan tahay in ay u
sinaato si cadaalad ahna u qeybsato. Kartida iyo aqoonta in lagu qiimeeyo qofka
laguna kala saaro dadka waa muhiim. Ka gudbida reer hebel iyo koox hebel in
laga tago oo cadaalad loo gudbo ayaa qasab ah wax walbana lagu wadaago cadaalad
hadii ay noqon laheyd waxbarasho oo tusaale ahaan hadii deeq waxbarasho la helo
dhamaan gobalada dalka si isku mid ah u qeybsadaan sidaa si la mid ahna
shaqooyinka iyo adeegyada bulshada. Wey adag tahay in si dhaqso ah lagu helo
cadaalada noocaan ah balse waxeey u baahan tahay dadaal badan. Dunida
taariikhdeeda waxaa bogag badan ku qoran cadaalad daro iyo gardarooyin badan
tusaale ahaan dalka mareykanka oo ah dal xurnimada, dimuqraadiyada iyo
horumarka ku faana waxaa taariikhdiisa ka mid ah cadaalad daro badan oo midab
takoorka uu ugu weynaa iyada oo waxyaabo badan oo kalana jireen.
Aad baad umahadsantihiin akhristayaasha iyo saxaafada Somaliland
Qalinkii Abdifatah Basher Hassan
burao,togdheer,somaliland
QIIMAHA CADAALADA.. WQ: Abdifatah Basher Hassan
Diinta islaamka Cadaalada waxa ay kaga jirtaa door muhiim ah Waa mowduuc aad u weyn oo xiriir la yeelanaya dhaqaalaha, bulshada, hogaanka iwm.