Ciidamada kala duwan ee Qaranka Somaliland, waa tiirarka qarankani ku taaganyahay, waxaan qirayaa in ay wax dheeryihiin ciidamada dalalka kale ee dunida, waxay ku hawlgalaan mushaharka ugu yar ee ciidan qaato dunida guudkeeda, iyagoo u adkaysta xaalada ugu adag ee askari ku shaqeeyo, iyagoo leh duruufahooda nololeed ee u gaarka ah hadana waxay gutaan waajibaadkoda.

Waxaan leeyahay hambalyo, waan bogaadinayaa, waanu idiin ognahay oo idinma mooganin in aad dartayo dhaxanta, milicda iyo dhibaatada u joogtaan, shacabka Somalilandna waa idin garab taaganyahay.

Dadka reer Somaliland waxaan ugu baaqayaa isku duubni iyo midnimo, danta guud oo meel looga soo wada jeesto, horumarka dalka, dadka iyo illaalinta diinta iyo dhaqanka suuban.

Waa muhiim in aynu isku hawlo sidii aynu usii jiri-lahayn, dawlad ahaan jiritaankeenu waa inoo muhiim, waa daruuri in aynu qaabayno sidii aynu dunida ulla macaamili-lahayn ee ugu yeelanlahay saaxiibo dhaw oo qadiyadeena inagala shaqeeya. Saaxiibka ugu horeeyaana waa jaarkeena waana inaynu kula noollaano xidhiidh-wanaagsan iyo iskaashi.

Soomaaliya, waxaan u soo jeedinayaa inay garwaaqsadaan xaqiiqada Somaliland iyo rabitaanka dadkeeda, (the will of the people) dhisitaanka, horumarka iyo madaxbanaanida Somaliland waxay dan u tahay dhamaan dayawga soomaalida, haday maalin Soomaaliya burburtay, Somaliland waxay noqotay mid dhibaatadii kasoo kabatay oo dhisantay, waxaanay farxad u tahay qof kasta oo Soomaaliya oo si fiican u fekeraya.

Waxaan beesha caalamka ugu baaqayaa in ay tixgeliyaan rabitaanka bulshadan Somaliland, waanu jiraa dad-ahaan, waanu dhisanahay dawlad ahaan, in dhegaha lagu furaysto dhawaaqa dadkayaga sax maaha. In aanu beesha caalamka ka mid noqonaa waa yoolkayaga inta aanu gaadhaynana dedaalka joojin mayno, waxaana iman doonta maalin xaqiiqada la qarin-kari aayo oo ay guushu timaado.

Wa Bilaahi Tawfiiq