Wararkii ugu dambeeyey ee aanu hadda ka helayno deegaanka Tukaraq ee gobolka Sool ayaa sheegaya in xaaladdu ay saaka sidii shalay ka degan tahay uusanna jirin dagaal foolka fool ah oo dhexmaray ciidamada labada dhinac ee ku sugan aaggaasi. Ciidanka Puntland iyo kuwa Soomaaliland ayaa waxaa lagu soo waramayaa inay ku sugan yihiin fariisimadii ay kaga sugnaayeen shalay galab deegaankaasi, waxaana meelaga qaar laga maqlayaa rasaasta ka dhacda qoryaha culus oo ciidanku ridayaan.

Hogaamada labada ciidan ayaa lagu soo waramayaa inay ciidankooda geliyeen heegankii ugu dambeeyey islamnarkaana ay hadda kujiraan diyaar garaw ku aadan difaaca aaggaasi ay kaga jiraan xilli midba midka kale ku eedaynayo dagaalkii shalay. Shirar kala duwan oo lagu qabtay Garoowe iyo Hargaysa ayaa waxaa Mid Kasta ku sheegay in kan kale uu dhankiisa shalay aroortii weerar ku soo qaaday mana jiraan warar madax banaan oo xaqiiqada deegaankaasi sheegaya.