Madaxweyne ku xigeenka Puntland Cabdixakiin Camey ayaa maxkamada sare u gudbiyey dacwada ka dhanka ah madaxweyne Gaas taas oo salka ku haysa magacaabista guddida xalinta khilaafaadka khilaafaadka doorashada baarlamaanka maamulkaasi, taas oo madaxweyne ku xigeenku ka hor yimid guddida uu magacaabay madaxweynuhu.

Sidoo kale wararka ayaa xaqiijiyey in madaxweynaha iyo ku xigeenku ay diyaarsadeen qareenadii u doodi lahaa, iyada oo maxkamadu ay dhawaan bilaabi doonto dhagaysiga dacwada u dhaxaysa labada masuul ee ugu sareeya dawlada maamulka Puntland.Sarkaal ka tirsan maxkamada sare ee maamulka Puntland ayaa warbaahinta gudaha maamulkaasi u xaqiijiyey inay jirto dacwada uu soo gudbiyey madaxweyne ku xigeenka, waxaanu intaas raaciyey in maxkamada sare awood u leedahay ka garnaqa dacwadaha siyaasiga ah maadaama aanay jirin maxkamadii dastuuriga ahayd.

Khilaafkii u dhaxeeyey madaxweynaha iyo madaxweyne ku xigeenka maamulka Puntland ayaa hada u muuqda mid sii baahaya isla markaana uu sii fogaanayo xal loo helaa, iyada oo haatan ay maxkamadu go’aan ka soo saari doonto.