Su'aal Baa ka Taagan Sonyo?
0 - Visits: 1231
-
- Share
Maanta waa maalintii loo asteeyey maalinta dhalinyarada Somaliland (Somaliland National youth day) Waxay ku beegan tahay 20 february 1982-kii, waa maalintii dhalintii Somaliland ee magaallada Hargeysa ku dhaqneyd dhagax isla hortaageen taliskii macangaga ahaa, waa maalintii halgankii dhagaxtuurku ka bilaabay Hargeysa, waa maalintii nafta loo hurray dhimasho iyo dhaawac, waa maalintii la muujiyey in Kaare dhagax laysla hortaagi karo, waa maalintii la muujiyey in mabda'u ka xoog badan yahay hubkasta oo cidi haysto, waa maalintii dhalinyardu ku dhiiratey ee dhabada u xaadhay in ay dhulkooda dhiig u shubaan, waa maalintii middaysey mowqifkii dadka reer Somaliland kadib markay rumaysteen dhaqankii taliskii daaquudka ahaa ee dulmiga iyo duudsiga ku dhisnaa, waa maalintii Hadraawi lahaa;
Hambaaber dhowaanta
Dareen ma hurdaana
Dagaal wata heeso
Hidday u lahayde
Hargeysi ma toostay
Hoggaanka ma diiddey
Harqoodka ma tuurtay
Inaanay hummaagga
Hadoodilan yeelin
Sidii hebed geel ah
Heshii Nebi Saalax
Horaaddada dhiiban
Hankeedu ma siiyey
Waxay hibanayso
Ninkay la hadlayso
Hagaag ma u sheegtay
Hadday sama weydo
Inay hantideeda
Nafteeda hurayso
Hubaal ma caddaysay
Allaylehe waa hog
Shax aan la hilmaamin.
Waa maalintii uu lahaa Abwaan Mujaahid Adaan Tarabi Jamac ( Tuug Tarabi)
Dhamme Abuhadrow
Ma og tahay dhulkii
waxa shalay ka dhacay?
Maalintii dhowayd
Dhadigii jahaad
Dhaba bay galeen
Carruurtuna dhadhaab
Dhulka tiilay bay dhirta
Ula baxeen
Dhanna haddalo culus
oo dhaxal galaa dharka
ugu qornaa
Dhayal u seexan mayno
Dheregna dooni mayno
Ninna ka dhowrsan mayno
Haddaanay Beder ka dheeraan
Waa haddaad dhalasho waydeen
Dhaayaha yagoow
Dhimashada xaqii
Waa dhaqan wadani...
32 Sano kadib maanta waa 20-kii february 2014, dhalinyarada Somaliland waxay ku damaashaadaysaa ku dabaal degaysaa ku daansha-daanshoonaysaa deeqdii dhiiga ahayd ee ay u bixiyeen Danabyadii iyo Diricyadii maalintaas dabka isugu shubay. Dhalinyarada Somaliland maanta xorriyada ay haysataan waa xinjir dhiigga oo laga dhuray halbowle geesi laguna beeray Somaliland, waa xorriyad xabad lagu keenay, waa xorriyad Xaawaleey u goblantay ganbo cadna u qaaday, waa xorriyad xaasidiin badan leh oo u baahan in sidda xabagta laysugu dhegannaado lagana dhowro xurgufta iyo xajiinta.
Haddaba waxaa innagu waajib ah in aynu dhowrno dhitadeena iyo dhaxalkeena oo ah Somaliland, in aan u ilaalino sidda ubadka loo ilaaliyo, waa in aynu isku duubnida iyo isku soohida shacabka Somaliland si gaara u xaqdhowraa, waa in aynu iska jiraa danaysteyaasha dareenkoodu yahay dalqo iyo dufan, waa in Dhalinyada Somlailand la timaadaa arragti cusub oo ka qotodheer qabiilaysi iyo reerraysi.
Uggu danbeyn Shacabka Somaliland gaar ahaanna dhalinyarada Somaliland waxaan waydiinayaa dhowrkan Su'aalood?
1- Ururka SONYO oo yidhi waxaanu nahay Somaliland National youth horta magacaas mow qalmaa?
2- SONYO Dhalinta Somaliland ee kala joogta Badhan illaa Boorame Buuhoodle illaa Boon Sool illaa Saylac Balidhiig illaa Berbera maku middaysan yihiin ururka SONYO?
3- Hogaanka ururku ma yahay mid loo simman yahay oo uu gudoomiye ka noqon karo muwaadin u dhashay u Somaliland oo ka soo jeeda, Laacaanood, Laasciidle, Lowyacado ?
Ali Kayse Kabadhe
Amsterdam/Netherlands
Su'aal Baa ka Taagan Sonyo?
Su'aal Baa ka Taagan Sonyo?