Saddex Falastiiniyiin ah ayaa naftooda ku waayay rabshado ka dhacay Bariga Qudus iyo Daanta Galbeed, sida ay sheegeen mas'uuliyiin Falastiiniyiin ah.

Boqolaal qof ayaa ku dhaawacmay rabshado maalmo ka socday agagaarka masjidul Aqsa.

Wasaaradda caafimaadka ee Falastiiniyiinta ayaa sheegtay in wiil 17 jir ah uu dhintay ka dib markii lagu toogtay deegaanka Ras al-Camud ee Bariga Qudus, halka nin kalena uu dhintay dhaawac kasoo gaaray rabshad ka dhacday deegaanka A-Tur.

Ninka saddexaad ayaa lagu dilay deegaanka Abu Dis ee Daanta Galbeed.

Dhinacyada Falastiiniyiinta ah ayaa ku baaqay in Jimcaha maanta ah uu noqdo maalin ay muujiyaan caradooda, ka dib markii ay Israa'iil tallaabooyin dhanka ammaanka ah kusoo rogtay xeyndaabka masjidka.

Xiisadda ayaa sare u kacday markii laba ka tirsan booliska Israa'iil lagu dilay meel u dhaw masjidka.

Weerarkaasi waxaa fuliyay saddex nin oo ah Carabta Israa'iil, kuwaasoo markii dambe lagu laayay gudaha deyrka masjidul Aqsa.

Kumannaan booliska Israa'iil ah ayaa saaka la geeyay agagaarka masjidka, ayagoo u diidday ragga Falastiiniyiinta ah ee da'doodu ka yartahay 50 jirka inay galaan qeybta qadiimiga ah ee Qudus oo uu masjidka ku yaal.

Qaar ka mid ah madaxda caalamka ayaa Israa'iil ugu baaqay inay xaaladda dejiso