Waxa mudooyinkii u danbeeyey magaalada Hargeysa ee caasimada Somaliland kusoo badanayay dhalinyaro,Baangado,Budad iyo Tooriyo ku hubaysan oo hadhka cad ee cadceedu soo jeedo dadka ku baadhanaya goobaha dariiqyada ah ee magaalada Hargeysa.

Waxaana ay dhalinyaradaasi inta badan dadka ay qabtaan waydiiyaan Moobilada gacanta iyo wax alle waxii ay haystaan,iyaga oo waxyeelooyina u gaysta dadka diida inay bixiyaan alaabtaas ay markaasi qofku wato.

Shacabka magaalada Hargeysa ayaa iyagu khaati ka taagan kooxo dhalinyaro ah oo u wada socda koox koox,kuwaas oo dadka si badheedha u baadhanaya,isla markaana dadka ku baadha goobaha madow iyo wadooyinka xaafada Hargeysa,iyaga oo taasina ay dheertay in suuqa badhtankiisa ay dadka ku baadhaan,waxaana ay dadka xoog kaga qaadaan wax kaste ay siitaan oo u badan waliba dhanka Moobilada gacanta.

Sakariye Axmed oo ku nool magaalada Hargeysa oo salaadii subax kadib moobilkiisa gacanta iyo lacag yar oo uu sitay lagaga qaaday badhtamaha magaalada Hargeysa ayaa nooga waramay dhacdadan iyo goobta lagu baadhay waxaana uu yidhi

"Wakhti ku beegan markii salaada subax laga soo food qaaday,ayaa aniga oo maraya badhtamaha magaalada Hargeysa gaar ahaana laamayda hor marta dugsigan Sheekh Bashiir ee Hargeysa,ayaa waxa iga soo hor baxay dhalinyaro ilaa shan ah,way I hareereeyeen,waxay igu qabteen badhtanka Laamayda oo markaasi waliba ay dad kalena marayeen,way I baadheen markaas waxay igala baxeen moobilkii aan gacanta ku sitay iyo lacag yar oo aan jeebka ku sitay,aadyar ayay iska talaabsadeen walaal,taas waliba waxa dheer cid kaste way baadhanayeen”

Sakariye isaga oo hadalkiisa sii wata ayaa waxa uu intaasi ku daray "Waxaan u cararay dhinaca saldhiga dhexe ee Hargeysa oo markaas cabaar ii jirey,askarta markaasi ku sugnayd way hurdeen,gaadhkii ayaa ii toosiyay saddex askari ,askartii oo markaa midi qori ku hubaysan yahay,nimankii dhalimyarada ahaa intay ka baydheen laamayda ayay saldhiga dhinaciisa danbe mareen,dadkii ayaanu tohoyanay,waxay ku beegmeen dhinaca bacadlaha Waaheen,halkii ayaanu raad gurney,goobta aanu marnaba waxaan kula kulmaynay dad ay iyagana gacanta sii mariyeen oo ay baadheen,ilaa masjid Jaamaca Hargeysa,halkaas ayaanu kasoo noqonay runtii arrintaasi yaab ayay igu riday,markaas anigu waxaan ku kalahayay madarasad Quraanka aan ka dhigto oo ku taala Tolowga,ama meel u dhaw Bariishka weyn ee Hargeysa "ayuu hadalkiisa kusoo koobay Sakariye Axmed.

Dad badan ayaa bulshada Hargeysa kamid ah ayaa ay dhacdadan oo kale ku dhacday,waxaana dhalinyaradan ay dhib badan ku hayaan bulshada caasimada Hargeysa,iyaga oo sidoo kalena xilliyada ay aadka dadka u baadhaan ay tahay wakhtiyada habeenkii ah,waxaana ciidamada Booliska Somaliland oo labadii habeen ee u danbeeyey hawl gallo adag ku jiray aad arkaysaa gaadiidka ciidanka oo gaaf wareegaya xaafadaha magaalada Hargeysa islamarkaana qabqabanaya dhalinyarada koox-kooxda u wada socda ee jidgooyada dadka u gala wakhtiyada habeenkii ah.

Foore