Wargeyska The Guardian oo Warbixin Xiiso Leh ka Qoray Somaliland -
0 - Visits: 725
-
- Share
- Wargeyska caanka ah ee The Guardian, ayaa Somaliland ka qoray warbixin dheer oo uu ciwaan uga dhigay ‘Macaluusha Somaliland caalamku kama jawaabayo ilaa carruurtu dhimanayso.’
Wargeysku waxa kaloo uu ka hadlay xidhiidhka ka dhaxeeya gargaarka Somaliland ka raaga iyo aqoonsi la’aanta.
Warkan waxa soo akhriyay oo warbixintan inooga diyaaray Cumar Maxamed Faarax, oo ka tirsan shabakaddaHadhwanaag News, waxaannu ku bilaabay sidan:-
"Wasiirka Arrimaha dibadda Somaliland, Dr. Sacad Cali Shire, ayaa sheegay in talaabada dalkiisu uu muddo 26 sannadood ah ku waayay aqoonsi uu ka helo beesha caalamku, ay dhalisay in mucaawimadu ka raagto dadka abaartu tabaaleysay oo tawsteedu qarka u saaran tahay inay isu beddasho macaluul.
Somaliland
oo dadkeedu lagu qadaray 4.4 milyan oo qof, waxay leedahay lacag u gaar ah, ciidammo iyo baarlamaan, waxaanay beesha caalamku u taqaanaa inay ka mid tahay dalka colaaduhu halakeeyeen ee Soomaaliya. In ka badan 1.5 milyan oo qof ayay abaartu saamaysay, waxaana abaaraha ku baxay xoolihii ay dhaqanayeen bulshadu, taasina waxay keentay in shuban biyood ka dilaaco.
"Aqoonsi la’aantu waxay keentay dhibaatooyin waaweyn. Ma helno caawimooyinka uu dal ugu deeqo dal kale. Taakulada oo dhan waxa naloo soo mariyaa gacan saddexaad sida UN-ka oo kale. Haddii nala aqoonsanaan lahaa, waxaannu heli lahayn kaalmooyinka dalalka. Waxa kaloo aanu kasban lahayn maalgashadeyaasha caalamiga ah, si aanu u abuurno dhaqaale xoog leh. Halka imika aanu ku tiirsan nahay uun xoolaha nool,”ayuu yidhi Wasiirka Khaarajigu.
Wasiir Sacad oo hadalkiisa sii watay wuxuu intaas ku daray; "Uma malaynayo inay dadku qaateen wargelintayadii aanu kaga digaynay ilaa horaantii sannadkan inay macaluul xumi ka dhacdo Somaliland. Beesha caalamku waxay u muuqdaan inaanay ka jawaabaynin baaqyada ilaa ay carruurta dhimanaya ka daawadaan muraayadaha TV-yada.”
Somaliland oo hore u ahaan jirtay maxmiyadii Ingiriiska, waxay madax-bannaanideeda ay kala soo noqotay Soomaaliya ay ku dhawaaqday 1991-kii, waxaana lagu amaanay siyaasadeeda deganaanshaheeda siyaasadeed xurguf la’aanta ka jirta.
Wakhti xaadirkan, waxa hoggaamiyeyaasha Somaliland ay dib u furayaan dhaqdhaqaaqyo diblomaasiyadeed oo ay ku raadinayaan aqoonsi caalami ah.
"Muddadii u dhaxaysay 1991-1997, waxaa na soo maray dagaalo iyo qulqulatooyin sokeeye, kuwaasi oo aanu u maareynay si ka duwan sida Soomaaliya, waxaanan ku xalinay dib-u-heshiisiin, hubka dhigis iyo maamul wanaag,”ayuu yidhi Wasiir Sacad, waxa uu sheegay in caalamku sannad ka hor sidii uu u nabadeyn lahaa Soomaaliya ku kharash gareeyay $2 Bilyan oo doolar oo u dhiganta 1.5 Gini, waxaanu su’aal ka keentay in hub cusub la siiyo Soomaaliya.
"Soomaaliya waxay ka faa’iidaysan lahayd madax-bannaanidayada oo waxaannu la wadaagi lahayn khibradayada ku wajahan sida loo sameeyo dib-u-heshiisiin iyo barwaaqo. Waxba kama doonayno Soomaaliya sida lacag, dhul. Waxaannu doonaynaa uun madax-bannaanidayada,”ayuu yidhi Dr. Sacad.
Wargeyska The Guardian oo Warbixin Xiiso Leh ka Qoray Somaliland -
Wargeyska The Guardian oo Warbixin Xiiso Leh ka Qoray Somaliland -