Wakiilka Somaliland u fadhiya dalka Ingiriiska Cali Aadan Cawaale ayaa waxba kama jiraan ku tilmaamay war la sheegay in laga soo xigtay Bogga uu Wasiirka Arrimaha dibada Somaliland ku leeyahay Twitterka.

 

Waxa uu sheegay in aanu warkaasi sal iyo raad toona lahayn, wasiirkuna aanu waxba ka ogeyn bogga la sheegay in laga soo xigtay warkan.

Qoraal kooban oo uu Wakiilku ku baahiyay Bogga uu ku leeyahay Facebookga ayaa waxa uu ku Yidhi "Waxa jiray qoraal facebook la soo dhigay xalay oo sheegaya inu Wasiirka Arrimaha Dibedda Somaliland mudane Maxamed Bixi Yonis bog uu ku leeyahay twitter-ka soo dhigay farriin ka hadlaysa caafimaadka Madaxweynaha Somaliland.

Haddaba waxan mar dhoweyd la xidhiidhay Wasiirka oo aan weydiiyey arrintaas waxanu Wasiirku ii xaqiijieyey inaanay jirin wax farriin ah oo uu diray, isla markaana aanu lahayn Twitter account-ka la leeyahay waa lagu soo qoray warkan aan sal iyo raad toona lahayn.

Waa bil soone dembi dhaaf ALLA aynu ka barino.

Wa billaahi Tawfiiq,

Ali  A . Awale

Wakiilka Somaliland ee UK