Real Madridayaa dhawaan soo bandhigtay xayeysiiska muuqaalka ah oo ay kusoo bandhigeen maaliyadahooda minan iyo marti ee fasalka dambe, Twitter-ka ayaa lasoo dhigay waxaana laga waayay weeraryahanka reer Portugal Cristiano Ronaldo.

Iyadoo ay taasi jirto ayey hadana kooxda website-keeda kusoo daabacday sawiro ay ku muujineyso qaabka ay ciyaartoyda ugu soo baxayaan maaliyadda minanka, balse mar kale waxaa laga waayay Ronaldo iyadoo kaliya booskiisa lagu soo daabacay magaciisa oo qura.

Arrintaan waxey walwal weyn galisay Jamaahiirta Los Blancos kuwaas oo ka walwalsan sida ay kooxda noqon doonto hadii uu Ronaldo ka hayaamo garoonka Santiago.

Cristiano Ronaldo ayaa inyar walaaciyay jamaahiirta kooxda kadib markii uu kulankii Kiev ee ay ku guuleysteen Champions League ka dhawaajiyay inuu maalmaha soo aadan jawaab ka bixin doono mustaqbalkiisa.

Mar kale ayuu jamaahiirta la hadlay isagoo kula dabaal dagaya ku guuleysiga koobka markii ay Madrid yimaadee isagoo u sheegay iney is arki doonaan sanadka dambe.

33-jirkaan ayaa lagu soo waramayaa inuu ka careysan yahay ciyaartoyda la sheegay iney imaan doonaan kooxda iyo sidoo kale ineysan kooxda dhanka mushaaraadka kala simin Messi & Neymar.

Dhanka kale Marca waxaa lagu qoray iney macquul tahay heshiis cusub in laga saxiixo isla markaana uusan jirin dareen uu kooxda kaga baxayo.