Shaqaalaha shirkadda sameysa diyaaradaha ee Boeing ayaa sanadkii 2016 la sheegay in ay isu direen farriimo ku saabsan cillad ay ku arkeen diyaaradda nooca 737 Max oo ahayd noocii labada jeer galaaftay nolasha boqolaal qof.

Dukumeentiyo qoraal ah oo shirkaddani Boeing ay ku wareejisay garyaqaannadeeda ayaa muujinayay in mid ka mid ah duuliyeyaasha diyaaraddaasi uu sheegay in dhibaato aan horey loo sii shaacin uu la kulmay xilli uu tijaabinayay diyaaraddaasi.

Waxa uu sheegay in "isaga oo aan is ogayn" uu been ugu sheegay hay'adda ilaalisa badqabka diyaaradaha ee Mareykanka.

• Boeing 737 Max: Maxaa khaldamay marklii uu dhacayay shilkii diyaaradda Itoobiya?
• Diyaaradda Boeing 737 oo cillad kale lagu arkay

Cillad dhanka hannaanka badqabka ee diyaaraddaasi ayaa lala xiriirinayaa laba shil oo ay ku dhinteen 348 qof.

Diyaarad laga leeyahay dalka Itoobiya oo nooceedu ahaa 737 Max ayaa bishii Maarso ee sanadkan burburtay daqiiqado uun ka dib ay ka duushay garoon ku yaal magaalada Addis Ababa, waxaana shilkaasi ku dhintay 157 qof.

Lahaanshaha sawirkaAFP

Diyaarad kale oo isla noocaasi ah oo laga leeyahay dalka Induniisiya ayaa iyana bishii Oktoobar ee sanadkii 2018 ku dhacday badda wax yar uun ka dib markii ay ka duushay garoon ku yaal Jakarta. Shilkaasi ayaa waxaa ku dhintay 189 qof oo saarnaa diyaaraddaasi.

Maamulka Duulimaadyada ee dalka Mareykanka ayaa macluumaadkani ku saabsan in cillad lagu arkay nooca diyaaraddaani xilligii ay tijaabo ku jirtay ku tilmaamay mid walaaceeda leh, waxa uuna sheegay in uu sharraxaad deg deg ah ka dalban doono shirkaddaasi.

Dukumeentigan ayaa soo shaac baxay xilli bishan gudaheeda uu billaaban doono dhageysiga dacwad ka dhan ah shirkaddan.

Madaxa shirkaddan Boeing, Dennis Muilenburg, ayaa sidoo kale lagu wadaa in uu caddeeyo waxa uu ka ogyahay cilladda lagu arkay nooca diyaaradda ay shirkaddaasi sameyso ee 737 Max.

Shirkadda Boeing ayaa sheegtay in ay gacan ka geysanayso baaritaannada lagu wado 737 Max, taa oo tan iyo bishii Maarso ee sanadkan la hakiyay isticmaalkeeda.

Lahaanshaha sawirkaGETTY IMAGES

Khubarada baaritaannada ku sameynaya burburkii diyaaraddaasi ee gudaha Itoobiya iyo Induniisiya ayaa baaritaankooga diiradda ku saaray barnaamij MCAS la yirahdo oo diyaaradda u sahlaya in si fudud ay hawada ku duusho.

Baaritaanno la sameeyay ayaa lagu ogaaday in cillad dhanka barnaamijkaasi ah iyo cillad kale oo dhanka qalabka diyaaraddaasi ah ay qeyb weyn ka qaateen in duuliyeyaasha diyaaraddani ay xakameyn waayaan diyaaraddaasi.

Shirkadda Boeing ayaa burburka labadaasi diyaaradood ku aaneysay macluumaad khalad ah oo la geliyay hannaanka ay diyaaraddani ku shaqeyso, waxa ayna ballanqaaday in ay wax weyn ka badali doonto si loo hubiyo badqabkeeda.

Balse baaritaanno la sameeyay ayaa lagu sheegay in shirkadda Boeing iyo maamulka duulimaadyada Mareykanka aysan si fiican u eegin cilladda haysata hannaanka diyaaraddaasi.

Shirkaddan ayaa la sheegay in "bilo ka hor" ay ka war heshay farriimaha ay is-dhaafsadeen duuliyeyaashii ka qeyb qaatay tijaabada diyaaraddan. Duuliyihii cilladan shaaciyay ayaanan haatan u shaqeyn shirkaddaasi.

Qaybaha sare ee diyaaradda Boing 737-ng ayaa dhammaadkii bishii Sebteembar lagu arkay dildillaac.