Danjiraha Dawladda Somalia ee Mareykanka Cumar C/rashiid Cali Sharma'arke ayaa la saadaalinayaa in loo magacaabo ra'iisul wasaaraha saddexaad ee Soomaaliya,

isagoo horay ra’iisul waasare uga soo noqday xukuumadihii KMG-ka ahaa ee Soomaaliya. Inkasta oo warar dheeraad ah oo arrintaasi ka soo baxayaa sheegayaan inay suurto-gal tahay in loo Magacaabo Marwo Foosiya Yuusuf Xaaji Aaden oo ahayd wasiirkii arrimaha dibadda Soomaaliya ee xukuumaddii Raysal-wasaare Saacid, imikana ka mid ah Mudanayaasha Baarlamaanka.

Cumar C/rashiid ayaa haddii loo magacaabo xilka ra’iisul wasaaraha wuxuu bedeli doonaa ra’iisul wasaaraha xilka sii haya C/weli Shiikh Axmed oo 6-dii bishan waayay kalsoonida xubnaha baarlamaanka Soomaaliya.

Sharma’arke ayaa wuxuu lasoo shaqeeyay madaxweynihii dowladdii KMG-ka ahayd ee Soomaaliya, Sheekh Shariif Sheekh Axmed oo ra’iisul wasaare u magacabaay, isagoo xilka hayay sannadihii 2009 illaa 2010, inkastoo uu iska casilay xilka kaddib khilaaf soo dhex-galay isaga iyo Sheekh Shariif.

Madaxweynaha Soomaaliya, Xasan Sh. Maxamuud ayaa danjiraha Soomaaliya ee dalka Mareykanka u magacaabay Cumar C/rashiid 14 July 2014, wuxuuna noqday danjirihii ugu horreeyay oo ay Somalia u magacowdo danjiraheed u fadhiya Mareykanka muddo 22-sano ka badan.

Xubno ka tirsan madaxtooyada Soomaaliya ayaa xaqiijiyay in laga yaabo in madaxweyne Xasan uu ra’iisul wasaare u magacaabo Sharma’arke dhowrka maalmood ee soo socda, halka ilo-wareedyo kalena Foosiya sheegayaan.

Si kastaba ha ahaatee, haddii Cumar C/rashiida loo magacaabo iyo haddii Foosiya la Magacaababa xilkaasi wuxuu noqonayaa ra’iisul wasaarihiisa saddexaad oo uu madaxweyne Xasan Sheekh magacaabo tan iyo markii loo doortay madaxweyne dhammaadkii sannadkii 2012-ka.

Ra’iisul wasaarayaashii ka horreeyay Sharma’arke oo kala ah: Cabdi Faarax Shirdoon (Saacid) iyo C/weli Sheekh Axmed oo xilalka ra’iisul wasaarenimo hayay min hal sano ayaa kalsooni ka waayay baarlamaanka kaddib markii ay is-qabteen madaxweyne Xasan Sheekh.. 

Contact@afkashacabka.com