FAXALNIMO MUUJI 18 MAY 2014: MUWAADIN KA QAYB-QAADO HIRGELINTA HIMILADA QARANKEENA EE KU WAJAHAN DHISMAHA WADADA CEERGAABO.
Asalaamu Calaykum
Sida Muwaadin kasta oo Somaliland u dhashay uu la socdo waxaa inagu soo aaddan
Maalintii Qaranimada ee 18 May oo aynu Sanadkan u Dabaal-degayno 23 Sanadood oo
Horumar ah, 23 Sanadood oo Barwaaqo ah, 23 Sanadood oo Dawladnimo nimo ah, 23
Sanadood oo ay Dadweynaheenu si Geesinimo ku jirto ay ugu Mashquulsanaayeen
Dhismaha Dalkoodii Burburay oo ay dhinac kasta horumar ka muujiyeen xaga
Dhaqaalaha, waxbarashada, Caafimaadka, Nabadgelyada iyo Dhismaha nidaamkeena
Dawladnimo, Saddex iyo Labaatankii Sanadood ee ay Jamhuuriyada Somaliland
jirtay waxa ay soo martay Jid aad u dheer iyo marxalado kala duwan oo macaan
iyo qadhaadhba lahaa. Allah Mahadi haka gaadhee maanta waxa aynu joognaa heer
lagu faano oo ay yar tahay cid gaadhi kartaa, waxa aynu nahay ummad isku
tashatay oo Allah talo saartay oo iyagu wax qabsaday oo ka soo talaabsaday
mixnado tiro badan oo lasoo kulmay sanadahaas ina soo dhafay, iyada oo
dadweynaha reer Somaliland guusha ay gaadheen ay sabab u tahay iyaga oo
muujiyay Isku Duubni, Wada Jir, Wada tashi, Isu tanaasul, Walaalnimo, wax wada
qabsi iyo Xaqa oo ay isugu gargaaraan xaq darradana kaga hor tagaan.
23 Sanadood ka Hor halka aynu socodka ka soo bilownay iyo halka aynu maanta
taaganahay waa meel aad u kala fog, waxaana inagu waajib ah inaynu sii
laban-laabno dedaalkeena oo aynu sii xoojino sidii uu Dalkeena Hooyo u noqon
lahaa Qaran Horumaray oo ay Muwaadiniintiisu ay helaan nolol deggan iyo
barwaaqo, sidoo kalana aynu u gaadhi lahayn Yoolkeenka ah in Qarankeenu uu helo
Aqoonsi Buuxa.
Hadaba inaga oo maanka ku hayna in Muwaadin kasta uu waajib ka saaran yahay ka
qayb-qaadashada horumarka Dalkiisa, waxa Sanadkan 18 May 2014 loo qoondeeyay
inuu noqdo Sanadkii Dhismaha Jidka Ceergaabo oo Muhiimad aad u balaadhan u leh
Qarankeena.
Waxaan usoo Jeedinayaa Jaaliyadaheena ku Dhaqan Dunida inay u hawl galaan sidii
aynu kaalin taariikhi ah oo lama ilaawaan ah aynu uga qaadan lahay Ururinta
Dhaqaalahii Jidkaas lagu dhisayo, waxaa magaalo iyo dal kasta ka dhisan
Gudiyadii loo Sameeyay Ururinta Dhaqaalaha Jidkaas Ceerigaabo, waana gudiga loo
xulay inay soo hooyaan Dhaqaalihii ay jaaliyaduhu ay hore ugu ballan qaadeen
ama ay doonayaan inay kagaga qayb-qaataan dhisamaha wadada Ceergaabo.
Hadaba Gudiyadaas loo Xilsaaray Ururinta Dhaqaalaha oo Kaashanaya Madaxda
Jaaliyadaha iyo Ururrada Bulshada ee ka jira Dal kasta, sidoo kalana Gacan
buuxda ka heli doona Danjirayaasha Somaliland ee wadamadooda jooga, xidhiidh
joogta ah iyo talooyina ka helaya Gudigii Heer Qaran ee Madaxweynaha
Jamhuuriyada Somaliland u xil saaray Dhaqaale Ururinta Jidkaas, waxaan usoo
jeedinayaa inay degdeg u abaabulaan shirar iyo kulamo loogu hawl galayo sidii
jaaliyadaha loo hawl galin lahaa si looga midho dhaliyo in Sanadkan 18 May 2014
uu noqdo Sanad taariikhda meel gaar ah ka gala oo aynu hirgalino dhismaha
Wadada isku Xidha Togdheer iyo Sanaag.
Somaliland ha Guulaysato
Amb. Kaysar Cabdilaah Maxamed
Kaysar@diplomats.com
FAXALNIMO MUUJI 18 MAY 2014: MUWAADIN KA QAYB-QAADO HIRGELINTA HIMILADA QARANKEENA EE KU WAJAHAN DHISMAHA WADADA CEERGAABO.
Hadaba inaga oo maanka ku hayna in Muwaadin kasta uu waajib ka saaran yahay ka qayb-qaadashada horumarka Dalkiisa, waxa Sanadkan 18 May 2014 loo qoondeeyay inuu noqdo Sanadkii Dhismaha Jidka Ceergaabo oo Muhiimad aad u balaadhan u leh Qarankeena.