Abwaan ibraahin Xamari iyo maansadii qiil beena !!!
Waxaan qaafka maansada
Qor qoraan diyaarshaan
Qodobkeeda sheegaba
Markaan qayilka taabtee
Qisadiisa sheegaa
Qirinqiir I cunayoo
Laywada qabsadayoo
Qadaf waxay ku sheegaan
Ayaa laygu qaadoo
Laygu wada qiraayoo
Waxaa laygu qoor xidhay
Qayilkuu duraayaa
Qarnigaynu noolnahay
Quruumaha aduun yadu
Halka ay qiyaasteen
Maxaa inaga qaafilay
Ma qabyaan dul joognaa
Ma qalwaan ku qanacnaa
Qaadiro kunooloow
Qareen kii iblayskoow
Qiilkaaga beentii
Qaayo yeelan maayee
Hana wada qisaasine
Qawlkaaga sii eeg
Anigiyo wixii qaba
Inuu yahay qadhmuun uu
Qarankeena dibu dhigay
Hadii aan qalaynaan
Qaadkaa ka hadalnaan
Qaloociisa sheegnana
Kuwa aan qaloonayn
Aad moodo qori iyo
Qaansooyin dhaadheer
Lala daba qotomo oo
Lagu wada qasbaayaa
Isa soo qutarayoo
Waxay qiil ka dhigayaan
Qoysas baa ku noolee
Yaan la qabaninee daa!!
Khamrigaa qadhmuunkaba
Qaarbaa kunoo lee
Miyaan uba qalaynaa
Qiilma u samaynaa
Ha quraarad miisee
Mise waan qabqabanaa
Qoyskaad kahadashana
Boqolkiiba qayb baa
Qoryahaa ku nooloo
Saamigii kaluu qalay
Qiimihii iyo lacagtii
Qarashkiyo xaqoodii
Qaran kalaa xisaabsaday
Qaadkaana ugu wacan
Qaadirkeen kayaaboo
Wixii qalada ee jira
Qaribaaya diintee
Bulshadiina qalayee
Qaybtii u waynayd
Qalqalooca naga baray
Maxaa looga quustee
Looga qaban dalkeenee
Qilaafkaa arlada dhigay
Hadii qaad la magac dhabo
Qori iyo budh wayn iyo
Qawlalada mid goysiyo
Qalab bay layaacaaan
Anna waan qorsheystoo
Qalin baan sitaayoo
Qasdi baan ka leeyahay
Allihii qoraalkiyo
Qalinkiyo cilmiga baray
Ummaddayda qaarkood
Ayaa qaadiroo jira
Dagaal kana qatiyo ciil
Qaxarkiisi baan nacay
Qiilbeena waan dhigay
Hadii aan qalaynaan
Qunjuraafno bahalkaan
Marlabaad qilaafnana
Kuwo qaadku daashaday
Qaadiradu reebtaa
Isa soo quturayoo
Waxay qiil ka dhigayaan
Qarankoo dhan baa cuna
Quwad gaar ahaaneed
Ayuu qaadku leeyahay!!
Il qalloocan ruuxii
Sikin qudha ku eegana
Awliyaa qalaysoo
Quudkeeda weeyaan!!
Lama qaban karaayee
Haku daalin qaad diid
Aniguna qiyaastii
Qiilkaasi beenta ah
Qawlkaan ka idhi waa
Maskax qiiqka baxayiyo
Qalbi aan wax garanayn
Ayaa saa u qaa taye
Quwaddii ilaahay
Ma qaadkaa ka sara maray?!!
Qaran baan dhisaynaa
Qorshihiisu wayn yahay
Qaadna waan cunaynaa
Waa wax aan is qabanayn
Hadii aan qalaynaan
Qunjuraafno bahalkaan
Marlabaad qilaafnana
Kuwo qaadku daashaday
Qaadiradu reebtaa
Isa soo quturayoo
Waxay qiil ka dhigayaan
Markaan qaadka taabtee
Caleen qudha qaniinaa
Qasnaduhu furmaanoo
Maskaxdayda qool iyo
Quful laga jabshaayoo
Markaasaan qiyaasaa
Qasdigayga aan wado
Hadii qaadku joogsado
Qorshihi iyo hawshii
Lama qumin karaayee
Sidee loo qabanayaa ?!!
Aniguna qiyaastii
Qiilkaasi beenta ah
Qawlkaan ka idhi waa
Maskaxdaada qoolkiyo
Qufulkaasi xoogale
Qaadkaa ku xidhay waar
Hadii qaadku joogsado
Qufulkaasi wuu jabi
Waxkastoo la qaadana
Qaadiro la’aanteed
Waa la qaban karaayaa
Qoladiinan sare ee
Qaran keena haysoow
Maydinkaa qisadan wada?
Oo waad u qasaddeen
Inuu qaadku daashado
Dhalin yarada qaarkood
Qurubkii kale hadhay
Inay qaar tahriibaan
Qurbahaa u yaacaan
Qaxoonti ay ku joogaan
Qaarna ay cidloobaan
Mise waad qorshayseen
Inaad qiiq ka kicisaan
Qaadkaba dhammaantii
Anigaan warkaa qaban
Hadii aan qalaynaan
Qunjuraafno bahalkaan
Marlabaad qilaafnana
Kuwo qaadku daashaday
Qaadiradu reebtaa
Isa soo quturayoo
Waxay qiil ka dhigayaa
Qufucuu daweeyaa!!
Qanjidhada xanuunee
Qoortaa ku yaalliyo
Muruqyada qalloocduu
Qumanaan u saaraa!!
Adigoo qatooboo
Qaxar iyo dhibaatiyo
Qandho ay ku haysana
Hadii aad qaniin taba
Qosol baad ka jagacsiin!!
Aniguna qiyaastii
Qiilkaasi beenta ah
Qawlkaan ka idhi waa
Qufac uu daweeyiyo
Qal qaloocba daayoo
Qabsin iyo xanuun iyo
Qaadiro kulal iyo
Qaaxiyo dhibaatiyo
Waallibay ka qaadeen
Kuwii quudan jiray kaa
Qiso weeye yaab lee
Bulshayahay qaloocdaa
Ma ilaa qiyaamaha
Ayaan qaad cunaynaa
Qudhun weeye bahalkuye
Maxaa looga quustee
Looga qaban dalkeenee
Qilaafkaa arlada dhigay
Hadii aan qalaynaan
Qunjuraafno bahalkaan
Marlabaad qilaafnana
Kuwo qaadku daashaday
Qaadiradu reebtaa
Isa soo quturayoo
Waxay qiil ka dhigayaan
Dhaqaaluhu ma qayb samo
Hadii qaadku joogsado
Maxaan quudka dhiganaa
Aniguna qiyaastii
Qiilkaasi beenta ah
Qawlkaan ka idhi waa
Ilaahaa qafuurkee
Arsaaqdana qoraayaa
Quudkeena dhiibee
Ma’og tahay qiyaamaha
Dadka keenna qooqiyo
Xaaraanta qaayibay
Inuu qaaca jahanama
Ka dhex qaylindoonuu
Ku qasaaray tiisii
inta aad qadhaadhkiyo
qoryahaa cunaysaan
qaran keenu duul yahaw
qabyo weeye joogto ah
miyaynaan qorshaynayn
qaramadu aduun yadu
inay nagu qadariyaan
qaayaha dhulkeeniyo
qiimaha dhaqaalee
qormadeenu leedahay?!!
hadii in uun qiyaastii
qasdigeenu kaa yahay
waa in laga qashaafaa
qaadkiyo asaagii
Abwaan ibraahin Xamari iyo maansadii qiil beena !!!
Qiso weeye yaab lee Bulshayahay qaloocdaa Ma ilaa qiyaamaha Ayaan qaad cunaynaa!!! ..... Qarnigaynu noolnahay Quruumaha aduun yadu Halka ay qiyaasteen Maxaa inaga qaafilay