Xukuumadda Somaliland, ayaa ansixisay xeerka la dagaalanka Argixisada iyo xeerka waxbarashada.
Golaha Wasiirrada Somaliland ayaa fadhigoodii shalay oo uu guddoominayay
Madaxweynaha Somaliland, Md. Axmed Maxamed Maxamuud (Siilaanyo) ku ansixiyay
labada xeer oo kala ah xeerka ka hortagga iyo la dagaalanka argagixisadda iyo
xeerka waxbarashada, sida uu sheegay afhayeenka Madaxtooyadda Axmed Saleebaan
Dhuxul.
Afhayeenka oo shirkii Golaha Wasiirrada ka dib saxaafadda la hadlay ayaa ka warbixiyay dhawr qodob oo lagaga hadlay shirkii fadhigii Golaha Wasiirrada Somaliland ee Khamiistii shalay, waxaanu yidhi
"Fadhigii maanta (shalay) ee Golaha Wasiirrada oo uu guddoominayay Madaxweynaha Somaliland, Mudane Axmed Maxamed Maxamuud (Siilaanyo) waxa Goluhu ku ansixiyay laba xeer oo muhiim ah oo kala ah, xeerka ka hor tagga iyo la dagaalanka argagixisadda iyo xeerka waxbarashadda qaranka. Labadan xeer oo ahmiyad u leh qaranka, markii xubnaha golaha oo dhami ka qeyb qaateen dooddiisii, waxa goluhu isku raacay in la ansixiyo”
Afhahayeenka Madaxtooyada Somaliland, Axmed Saleebaan Dhuxul waxa uu sharaxay
ahmiyadda xeerka ka hortagga iyo la dagaalanku argagixisadu u leeyahay dalka,
waxaanu yidhi "Xeerka ka hortagga iyo la dagaalanka waa xeer ahmiyad weyn leh
dalka, waad otihiin mandaqadda Geeska Afrika waxa ka taagan meelo badan ayay
amni darro ka taagan tahay, sidii aynu awlba heeganka ugu jirnay ee aynu uga
feejignayn inaynu ka hor tagno wixii dalkeenna khal-khal iyo dib u dhac ku
keeni kara ayaa xeerkan muhiimadiisa loo baahday. Xeerka ka hortagga iyo la
dagaalanka argagixisadu waa xeerkii aynu amnigeena ku sugaynay ee caalamkuna
inagula shaqeynayay, sidaas darteed ayaa loo baahday xeerkan”
Afhayeenku waxa uu intaas ku daray in sidoo kale Golaha Wasiirradu isku
waafaqeen, isla markaana qalinka ku duugeen xeerka waxbarashadda oo horumarka
qaranka hal-beeg u ah "Ummad walba horumarkeeda waxa lagu arkaa heerka
waxbarashadeedu taagan tahay, xeerka waxbarashadda qaranka waxa soo diyaarisay
wasaaradda waxbarashada iyo tacliinta sare waxaanu ku wajahan yahay horumarinta
tacliinta waddanka. Labadan xeerba waxay u gudbi doonaan Goleyaasha sharci
dejinta…” ayuu yidhi, Afhayeenka Madaxtooyada JSL.
Afhayeenku waxa kale oo uu sheegay in dawladda Kenya ay xafiis danaheeda ka
shaqeeya ka furanayso Hageysa "Dawladda Kenya waxay si rasmi ah u aqbashay inay
Somaliland xafiis danaheeda ka shaqeeya ka furtaan, Nairobi iyaguna (Kenya) ay
xafiis kaas la mid ah ka furtaan Hargeysa waa tallaabo muhiim ah oo hore loo
qaaday, waana tallaabo qarankeena wax tari doonta runtii,”ayuu yidhi.
Ansixinta Golaha Wasiirrada Somaliland ee xeerka la dagaalanka argagixisada,
ayaa ku soo beegmaya xili dawladda Ingiriisku sheegtay inay xayiraaddii dhanka
socdaalka ka qaaday Hargeysa iyo Berbera, isla-markaana dadkeedu iman karaan,
waxaana la sheegay in sababta loo asnxiyey xeerkani uu tahay inuu ku jiray
qodobbo la xidhiidha ammaanka Somaliland oo uu Wasiirka Afrika ee Ingiriisku u
soo bandhigay xukuumadda Somaliland, kana codsaday inay fuliso, taasi oo
xukuumaddu isla shalayba ka jawaabtay inay meel mariso.
Ilo-wareedyo ayaa wargeyska Somalilandtoday u sheegay inay suurto-gal tahay in
dawladdu Ingiriisku ay guud ahaan Somaliland ka qaado xayiraadda dhanka
Socdaalka, mar haddii la ansixiyey xeerka la dagaalanka argixisada oo la
wariyey inuu ahaa shuruud dawladdu Ingiriisku ku xidhay xayiraad ka qaadista
Somaliland ee la xidhiidha dhanka ammaanka.
Afkashacabka.com
Hargeysa /Office
Contact@afkashacabka.com
Xukuumadda Somaliland, ayaa ansixisay xeerka la dagaalanka Argixisada iyo xeerka waxbarashada.
Afhayeenka Madaxtooyada JSL oo shirkii Golaha Wasiirrada ka dib sina saxaafadda la hadlay ayaa ka warbixiyay dhawr qodob oo lagaga hadlay shirkii fadhigii Golaha Wasiirrada Somaliland ee Khamiistii shalay, waxaanu yidhi