Abwaan ibraahin Xamari iyo maansadii Soomalhaad / waa taxanihii Buuga mahiigaan
0 - Visits: 1970
-
- Share
MAAN SADA (SOOMALHAAD)
Maansadan lamagac baxday soomalhaad waxaa curiyay Abwaan Ibraahin Xamari) taariikhdu markay ahayd 2008/06/04 oo ay tahriibtu aad iyo aad u soconaysay taas oo kaliftay in dhalin yaradii oo dhami ay ku hamiyaan inay wadamada reer galbeedka ay u tacabiraan.
Dhalintan wadankooda kayaacaysana ma hayso wax dhaqaala la’aan ah ama shaqo la’aan ah, ee la helikaro wax uu qabto qofkasta oo muwaadin ahi, balse aanu ku baraarug sanayn ee ay hareerihiisa ka buuxaan shaqooyinkii lagu dhaqaaqi lahaa.
Laakiin haday arkaan ay hubaal tahay in wadankeena laga dhigi karo siday wadamada reer galbeeedku yihiin.
maansadan lamagac baxday (soomalhaad) oo arimaha tahriibta qaadka dhaqanka iyo waxyaabo kale oo badan ka hadlaysa ayaa tidhi sidan.
Abwaanada sareeyee
Suugaanta maalaa
Idinsiiyay talo oo
Sikastaba u dhigayoo
Idinma solin warkoodi
Anigana sidoo kale
Saaxiibayaaloow
Hadii aan sidiinaa
Tahriib soo diyaarsado
Wadan keeni yaa sugi
Waa su’aal da’waynoo
Jawaab saxan u baahane
Soomaalidoo idil
Hadii saaka gabigood
Sadar dheer la galiyoo
Fiisayaal la siiyoo
Yurub lagu sagaal guro
Soomaali yaa hadhi
Ingiriiska saakaba
Sida ba’an u jeceshiin
Sidan uu ku sugan yahay
Subax qudha ma noqonine
Silic buu u soo maray
Samirbaa sadxoogloo
Sayidbaa dul qaadlee
Siqiir iyo cirroolaba
Intaad wada siqaysaan
Tahriib aad usocotaan
Surmigiyo haraad kiyo
Saxaraha dushiisiyo
Soomalhaadka duhurkiyo
Xeebaha silcaysaan
Wadan kiinu suu yahay
Dhulka maad u samirtaan
Maad wada sintaanoo
Soormaad ka beertaan
Dabadeedna saacaa
Siqiirkiyo caruurtiyo
Saboolkiina siisaan
Baahida salgoysaan
Hadii saac kasoo hadho
Suuq yada aduunkaa
Sixir jaban ku gaysaan
Awdal iyo sanaagiyo
Sool iyo hargaysiyo
Saaxil iyo togdheeriyo
Sabadii gabiileey
Waxuun maad ka saartaan
Si markaynu eegnana
Seereheenu waa hodan
Badahaa salkoodaa
Markabadu sunsumayaan
Sanca iyo sucuudiga
Safar wayn kasoo rara
Marna sii baxaayee
Sumalka iyo awrkiyo
Dibiyada sidaa ay
Sida wacan u marayaan
Niman baan siciidoow
Sawir gaara mooyee
Aan arag siday tahay
Saxaraha dushiisana
Nimanbaa ku suganoo
Siday tahay ku raba oo
Aan ka socon sidiinaa
Dalalkaa samada tagay
Qaarbaa siqiiroo
Dadku seenna ma’ahee
Milyanaad sare’u maray
Soomaalilaand waa
Sedex iyo sagaal iyo
Inyaroo sideetana
Dakad saafiyoo wacan
Ilaah baa na siiyoo
Wadankeenu saxariyo
Meel saluugle ma’ahee
Si’uun maad waxyeeshaan
Hadaydaan samaynayn
Sagalkaa aroortiyo
Markuu waagu sara kaco
Maad wada socdaashaan
Maad soo jarmaadaan
Cilmi maad u samirtaan
Ilaahbaa sareeyee
Waxuun maad samaysaan
Hadaydaan samaynayn
Samirbaa sad xoogloo
Sayidbaa dulqaadlee
Siqiir iyo ciroolaba
Intaad wada salaxantiin
Sinta aad u jiiftaan
Salka ciida saarteed
Qaadka aad simaysaan
Murqaan aad ku sugan tiin
Ictiraaf sugaysaan
Sunnihii rasuulkiyo
Maad diinta sidataan
Aad salaada tukataan
Aad soomka haysaan
Saaxiibayaaloow
Wax kastaaba waa sahal
Maad sababta keentaan
Umad waliba saaxiib
Sideenay ahaydoo
Dhaqan iyo sinaan bay
Samadaa ku gaadheen
Waxaa taa sifaynkara
Carabta sabanka maanta ah
Saafida u haysaa
Sunnadii ismaaciil
Bay sidatay waligeed
Markii ay saluugnayd
Seeraha kaleexdeen
Sida wacanka baydheen
Sanamkiyo qadhmuunkiyo
Daaquudka soo ura
Sacabbada ku sidatiyo
Markii ay saxnaydee
Diinteenna sare ee
Subxaan keenu soo rogay
Sayid maxamed raaceen
Sodankaa quraanka ah
Sadar sadar u qaybeen
Iyo saaka maanta ah
Carabi way sinnaydoo
May saydhin dhaqankii
Khamiisbay ka sidataa
Kooda ugu sareeyiyo
Kaan sidanin diinaar
Dhaqanka way kasimanto
Khamiisbay ka sidataa
Kooda diinta sida ee
Cilmiga u sareeyiyo
Kaan tukan salaadaba
Dhaqanka wayka simanto
Khamiisbay ka sidataa
Inta saydhay dhaqankee
Siigada ku tuurtee
Saxarrada ka biinayn
Way soo tirsamayaan
Soomaalideenuna
Sidaasay ahaydoo
Soo sidatay dhaqanoo
Ku dhaqmaysay sanadee
Saaka maxay ka haysaa
Sidaad mooday maahee
Dhaqankeeni laga socay
Innamadii saxnaan jiray
Qaarbuu surwaalkii
Sinihiiba dhaafoo
Badhidaa salkeediyo
Bawdada sunsumayaa
Qaarbaad sargooyada
Socod kooda mooddaa
Sidii awr culays sida
Sinta bidix ka dheeliyay
Qaarbaa sidoo kale
Timahoodi suufkaa
Sida ay u gooyeen
Socod kooda laga naxo
Hablii suubanaan jiray
Dhaqankood sareyee
Weedhood saxnaydee
Sooryadiyo qorigiyo
Sodon geela goyn jiray
Boqor iyo subeeciyad
Sadexqaydka xidhan jiray
Si kalay barteenoo
Garan iyo surwaalbay
Suuq yada ku marayaan
Qaarbaa sirgacanoo
Ku saluuqan dhajisoo
Awr seeto lagu xidhay
Socod kooda moodaa
Qaarbaa kasii daran
Xishoodkiiba sayadhoo
Suuqyada ordaayoo
Habeenkii sagaalada
Saqbadhkaa markay tahay
Sidii aarankoo kale
Sakadaha labaacsado
Waa su’aal jawaablee
Diintii saxnayd iyo
Sunadii rasuulkaba
Mala saydhay saaxiib?
Waa wax laga sasaayee
Dhaqan kii sugnaan jiray
Mala raacshay saaxiib?
Aan sidaa u eegoon
Saadaasha baadhee
Sikin kaynu joognaba
Qaarbaan sugaynoo
Odhan doona saaxiib
Ninkan xunee sirgacanee
Sawaxanka iyo qaylada
Samadaa ku dhagayaa
Muxuu yahay sidiisaba
Aan yara socdaalaan
Su’aashaa bal eegee
Waxaan ahay nin soo jiray
Socdaaldheerna soomaray
Surmigiyo haraadkuna
Seedihiisa gooyeen
Misna ay sunsumayaan
Sinihiisa meel udhow
Wabiyaal sagaal ihi
Waxaan ahay nin suuf iyo
Suuman beerka ku xidhoo
Ay sidato gaajoo
Ku siqaaya badhidoo
Socodka aan awoodayn
Misna hadii la sahamiyo
So’da uu ku nool yahay
Subaga iyo soortuba
Sixniyada ka buuxaan
Waxaan ahay siqiir iyo
Nimaan saafi helahayn
Nolol san aan kunoolayn
Soor yada uu cunayiyo
Sahayda aan awoodayn
Hadana aan sifeeyee
Saracaa baxaayiyo
Geelaa sidkiisii
Saaka uu ku eeg yahay
Ganacsiga soconayee
Maraakiibta lagu sido
Sayidkoodu waa ani
Car isaara miisaan
Keebaa isixi kara
Maxaan ahay sidaydaba
Sideebaan ku noolahay
Maxaa aan sitaa sheeg
Hadana soo rogaal celi
Soomaalidii hore
Waxa ay sideedaba
Inasiisay dhaxal iyo
irsi aan sal guurayn
Dhaqan iyo sinnaan iyo
Suugaan la jecel yahay
Waxaa taa kusii jiray
Nin sigaarka quutaa
Saaka reer mabiilaa
Su’aashaa jawaabteed
Maya weeye saan odhan
Sabankaynu joogniyo
Sanadkeenan maanta ah
Waxaa saaka soo baxay
Midkaloo ka sii daran
Dhaqan keeni soo dilay
Dhalintii sansaan rogay
Dhaqaaleheeni soo xidhay
Wadan keeni sii rogay
Cadawgeeni saaciday
Diintii saxnaydiyo
Sunadii rasuulkana
Ka hor jeeda saaxiib
Ninkii suuban dhiqilaa
Ninkii sidigta xoorkale
Nirigteeda sidilaa
Saraakiisha wadankiyo
Ninkii seerba noqonlaa
Tixda iyo sidida iyo
Suugaanta dhaadheer
Ninkii soo bandhigilaa
Suuradaha qur’aankiyo
Xadiis yada saxiixiyo
Ninkii diinta sidilaa
Ninkii cadawga sayntale
Sodon sodon u dililaa
Sii iyo caqaar iyo
Sadex sadex mijood iyo
Shaahiyo sigaarkaa
Ninwaliba sitaayoo
Subixii la keenaba
Sagaal saac markay tahay
Salli wayn la fidiyaa
Si cad loo fadhiistaa
Saqbadhkay ku gaadhaan
Waxaa taa ka sii daran
Sodohdi iyo wiilkii
Seedigi iyo odaygii
Salli bay ku qayilaan
Sibyaan tiyo barbaartina
Sidaasay ku raaceen
Waa su’aal jawaablee
Diintii saxnayd iyo
Sunnadii rasuulkaba
Malasaydhay saaxiib
Waa wax laga sasaayee
Dhaqankii sugnaanjiray
Malaraacshay saaxiib
Wali waan samraayaa
Sun ma’aanan saydhinin
Waabay ma soo qubin
Seeftaydi dheerayd
Galka mayka soo bixin
Waxa weedh salaxanee
Dhagihiina solayaa
Waa siinka oo qudha
Waxba yaanan sii socon
Sidida yaan ku dheeraan
Sidan maysu dhaantaan
Abwaan ibraahin Xamari iyo maansadii Soomalhaad / waa taxanihii Buuga mahiigaan
Siqiir iyo cirroolaba Intaad wada siqaysaan Tahriib aad usocotaan Surmigiyo haraad kiyo Saxaraha dushiisiyo Soomalhaadka duhurkiyo Xeebaha silcaysaan Wadan kiinu suu yahay Dhulka maad u samirtaan