Manchester (AFKA)Tababaraha kooxda Real Madrid eeZinedine Zidane ayaa cadeeyay in Cristiano Ronaldo iyo Karim Benzema ay boqolkiiba boqol taam u yihiin in ay ciyaaraan kulanka Manchester City ee lugta hore ee Champions Leaque-ga oo ay habeen danbe ka dhici doona Etihad Stadium.

Zinedine Zidane oo ka hadlayay shirkisa jaraa’id ee ka horeeya kulanka Manchester City ayaa sidan xaqiijiyay wuxuuna yidhi:"Ronaldo iyo Benzema boqolkiiba boqol ayay taam yihiin, waxaan tijaabin doonaa wax kasta, laakiin fikradu waxay tahay in ay ciyaari karaan”.

Zinedine Zidane oo hadalkiisa sii wata ayaa yidhi:"labadooduba horumar fiican ayay sameeyeen, waxaanu eegi doonaa sida ay barri noqdaan, qof kastaaba waxa uu doonayaa in uu kulankan ciyaaro. Waxaanu hadda qaadan doonaa tababarka ugu danbeeya waananu eegi doonaa. Waa ciyaartoy nafdooda jidh ahaan udaryeela, waxaan filayaa in ay fiicnaan doonaan si ay u ciyaaraan, maanta way fiican yihiin”.Real Madrid ayaa bilaabtay tababarka ay ugu diyaar garoobayso kulanka Manchester City ee habeen danbe, waxaana tababarka qayb ka ah Ronaldo iyo Benzema.

Zidane oo ka hadlaya kulanka Manchester City ayaa yidhi:"Waxaan halkan City ka samayn doonaa waxa ugu fiican ee aanu awoodno, City waxay anaga nagu samayn doontaa cadaadis, xaalka ayayna nagu adkayn doontaa, laakiin taas diyaar ayaanu u nahay.

Gareth Bale oo Zidane shirka jaraa’id la qabtay ayaa hadalkiisa raaciyay:"Waanu ognahay in uu noqon doono kulan adag, laakiin qof kastaba waxa uu u noqon doonaa kulan xiiso badan in la daawado. Kulamada lugta hore markasta cadaadis ayaa ka jira wayna xidhan yihiin, laakiin wax kasta oo ugu fiican ayaanu siin doonaa”.

"waxaanan rajaynayaa in ay noqon doonto mid ku filan. Anigu waxaan la yaabanahay in ay xili hore Manchester City halkan soo gaadhin, waa koox horumar samaysay oo xoog ku noqotay Premeir Leaque-ga. Hadda City aad iyo aad ayay u fiican tahay waxaanan rajaynayaa in aanu awoodi doono in aanu joojino”.ayuu Bale hadalkiisa sii raaciyay.

Zinedine Zidane oo ka sii hadlaya Manchester City ayaa yidhi:"Kooxda aanu ka hor imanaynaa waa koox wayn, haddii aad City baan u samayso waay ku dhibaataynaysaa, ciyaartoydu way isku xidhmayaan dhibaato ayayna kugu abuurayaan, waxaanu isku dayi doonaa inayna taasi dhicin, kadib waxaanu heli doonaa kubbada aanu doonayno in aanu cadaadis ku samayno kaas ayaa ah qorshaha”.

Zinedine Zidane oo ka hadlaya qorshaha kooxdiisa uga yaala Keven De Bruyne ayaa yidhi:” Qorshaha De Bruyne? waanu isku dayi doonaa in aanu samayno. Waxaanu ognahay in uu yahay ciyaartoy sare oo ku jira qaab ciyaareed fiican. Markii uu kooxdan yimid waxa uu muujiyay tayada ciyaartoy ahaaneed ee uu leeyahay, waxa uu si fiican ugu xidhmaa Aguero, waxaanu eegi doonaa waxa dhaca barri, waxaanu isku dayi doonaa in aanu isaga ula ciyaarno sida ugu fiican ee aanu awoodno”.