Waa Maansadii SOCDAAL iyo Abwaan Ibrahin Xamari
SOCDAAL
Maansadan la magac baxday socdaal abwaanku waxa uu curiyayay taariikhdu markay ahayd 16/8/2014.
Waxa uu abwaanku maansadan ka mariyay hoolka shaqaalaha dawladda ee magaalada hargaysa halkaas oo uu abwaanku ku soo bandhigay maansadan la magac baxday socdaal.
Abwaanku waxa uu maansadan kaga hadlayaa oo uu ku tilmaamayaa socdaalka nolosha iyo aduunka oo dhan iyo sidii loola jaanqaadi lahaa.
Hadaan saaka iyo caawa
Socdaalka aduunka eego
Hadaan sadar qudha ka sheego
Hadana suugaan ka yeelo
Anoo kala saari doona
Xumaantiisiyo samaanta
Siduu yahay aan tilmaamo
Socdaalkaa kala haboone
Midbaa saxan oo wanaagsan
Midbaa sakal iyo qalooc leh
Midbaa ka sirgacan horaanta
Gadaashana laga saluugin
Midbaa surmi iyo harraad leh
Midbaa sahan li’i ku guura
Socdaalka aduunku heedhe
Siduu doonuu noqdaaye
Hadii umadii socdaashay
Aduun kii wada siqaayo
Samada loo wada carceeray
Mariikh iyo suxal la gaadhay
Adigu iska seexo maaha
Sariirta ku jiifso maaha
Aduunka ka saahid maaha
Siduu nabigeenu sheegay
Aduun yadu waa sodcdaale
Adoo aakhiro sugaaya
U saad qaatoo diyaara
Socdaalkeedina u jeeda
Aduunkana sii wad weeye
Hadii cilmigaa sareeya
Aqoontiyo seedeheeda
Xisaabtiyo sayniskeeda
Safdheer loo wada galaayo
Adigu iska saaqid maaha
Ka seeg seeg oo hadh maaha
Salaanka ka soo dhac maaha
Si aad khayrkaa u dhaafto
Si aad saamayn keento
Adoo saad buuxa qaatay
Adoo sahaydii diyaarshay
Aduun yadu waa socdaale
La raac safar kooda weeye
Hadii sahaloow aduunka
Subxaanku wuxuu nasiiyay
Wakhtigu ugu wada sareeyo
Adigu iska saydhi maaha
Ka saar noloshaada maaha
Sabaanka illaawa maaha
Sidii odayadan habawsan
Ilaa subaxiyo sagaalka
Maqaaxi ku saamalayla
Halkaa ku sakhraama maaha
Hadii saacadi ku dhaafto
Adoon ku sallaynin meelna
Siday kugu dhaaftay taasi
Su’aal nafsaddaada weeye
Qabiilka allaa sameeyay
Ilaahbaa nagu sifeeyay
Haday saa tahay amuurtu
Dadkaa kula siman dhamaanba
Adigu kala sooco maaha
Qabyaalad sameena maaha
Badhkood saluugna maaha
Si aad dadka ugu dhaxayso
Si aad saamayn u keento
Sinnaantana aad u dhawrto
Subxaankuna wuu arkaaye
Cadaalad sameeya weeye
Hadaan wadankeena saaka
Siduu yahay aan jaleeco
Dadkoo surinkii ka baydhay
Markii subaxii la gaadho
Intoo sali wayn la qaato
Halkaa saldhig laga samaysto
Murqaan lagu wada sugaayo
Hadii saaxiibadaadi
Suntaa qaadka ah ku waashay
Halkaa saldhig looga yeelay
Adigu iska soo gal maaha
Sidooda la daaqna maaha
Murqaanka la suuxa maaha
Waxaan jirin soo dhis maaha
Si aad saaxiibadaada
Suntaa qaadka uga reebto
Si aad saamayn u keento
Dalkeenana uga safayso
Murqaanka samaha la mooday
Inaad ku saluugto weeye
Adoo sarif iyo aduunle
Adoo sarac beeranaaya
Adoo suuqii dhex jooga
Adoo sayidoo dadaalay
Inuu saaqii tahriibku
Hankaa ku sulaaqmo maaha
Naftaadiyo sawracaaga
Inuu saameeyo maaha
Inaad saxaraha dushiisa
Ku soo silicdaana maaha
Si aad sanqadhaa baxaysa
Dhegtaadaa uga safayso
Si aad saamayn u keento
Intaad noloshaada seesto
Naftaadana samirtidhaahdo
Dariiq u samayso weeye
Socdaalkii ugu horeeyay
Intaan loo sahay diyaarsan
Marbaa sahaloow ugaadha
Sidii diibkiyo libaaxa
Ilkaha lagu saafay jiidhka
Sakiintiyo seefta maanta
Markaa sacab laguma haynin
Hadana waa laga socdaalay
Marbaa waramada safaysan
Dagaal lagu qaaday seefo
Hadana suug iyo diyaarad
Markaa sacab laguma haynin
Hadana waa laga socdaalay
Socdaalku siduu u jeeday
Sidii safar loogu joogay
Hadana samadaa la gaadhay
Waxaa saldhig laga diyaarshay
Dayaxa seeraha ku yaala
Waxaa nukliyeer samaystay
Socdaalka aduun yadeenna
Kuwii ugu wada sareeyay
Safkaasi wuxuu ku gaadhay
Sarkaalnimadaa horraysa
Aqoonta la saaray xooga
Aduunyadu waa sidaase
Inaga soomalideena
Maxaa soocee ka reebay
Sidii aan wada ogaynba
Dalkiyo midawgaan samaynay
Samada calankii la mooday
Dadkuba sacabka u tumaayay
Markii saldhigii la waayay
Markii suuq kale la geeyay
Markii sees kiisi liicay
Markay surinkii ka baydhay
Markay suyucday xumaatay
Markii lays wada saluugay
Aduun yadu waa socdaale
Miyaynaan kaba socdaalin
Miyaan soomaalilaantan
Togdheer lagu seesin maalin
Anoo sii daba galaaya
Su’aashana raacinaaya
Waxaan idin wada su’aalay
Aduun yadu waa socdaale
Socdaalkiyo geedigeenu
Halkee buu ina dul saari?!!!
Ma meel soor iyo aduun leh
Ma meel siigo iyo boodh leh
Ma meel same iyo wanaag leh
Ma meel sicil iyo dagaal leh
Samaanta la waayi doono
Ma meel sare oo wanaagsan
Aduunkuna nala sinnaado
Su’aal weeyaan haboone
Jawaabta saxa ah u raadsha
Waa Maansadii SOCDAAL iyo Abwaan Ibrahin Xamari
Hadii umadii socdaashay Aduun kii wada siqaayo Samada loo wada carceeray Mariikh iyo suxal la gaadhay Adigu iska seexo maaha Sariirta ku jiifso maaha Aduunka ka saahid maaha