Raysal wasaare ku xigeenka dawlada federaalka ah ee soomaaliya Mahdi Maxamed Guuleed Khadar ayaa soo saaray amar saamaynaya garoonka diyaaradaha ee magaalada Muqdisho.

Warqad amar ah oo ka soo baxday xafiiska raysal wasaare ku xigeenka soomaaliya Mahdi Maxamed Guuleed ayaa lagu sheegay in la mamnuucay qashin la sheegay in lagu qubi jiray garoonka diyaaaaradaha ee magaalada Muqdisho.

Warqada amarka ah ee ka soo baxday raysal wasaare ku xigeenka soomaaliya ayaa lagu socodsiiyey wasiirka gaadiidka iyo duulinta hawada, xafiisyada Amisom iyo qaramada midoobay ku leeyihiin magaalada Muqdisho.

Raysal wasaare ku xigeen Mahdi Maxamed Guuleed ayaa warqada amarka ah ee uu soo saaray ku sheegay inuu kordhay qashinta lagu qubo isla markaana dhexyaala garoonka Aadan Cade ee Muqdisho, isaga oo cadeeyey in wixii ka dambeeya 1- bisha July ee soo socota in la mamnuucay in qashin lagu shubo madaarka Muqdisho.

Sidoo kale, amarka raysal wasaare ku xigeenka Soomaaliya ayaa lagu mamnuucay in gudaha madaarka lala galo hadhaaga dawooyinka, agabyada gubtay iyo waxyaabaha qashinka noqon kara ee madaarka lagaga tari karo.