Magaaladda Ceegaag oo ah goob biyo ka dheer ah isla markaana ay ku adag tahay in qof ugu badheedho inuu beer ka yagleelo ayaa hada maraysa in lagu tijaabiyo dhir aan laga quudarayn in degaanada waqooyi lagula tahanbaabo inay faa'iido keeni karaan. C/kariin Cali Abokor oo ka mid ah dadkii aasaasay 6/6/2006 magaaladda Ceegaag ayaa mudo yar ka dib hindisey isagoo kaashanaya xoogiisa iyo ka qoyskiisa inuu baahida qudaareed ee degaankaasi u baahnaan karo uu buuxiyo. C/kariin waxa uu madaraqa la galay dhul carsan ah balse oomane ah, waxana uu mudo kooban milaalay inta badan khudaarta geed gaabka ah oo ay ka mid yihiin Yaanyada, Basbaas, Basal, iyo qaar kale oo badan.

Waqti haatan shan sano laga joogo ayaa beerta talaabooyin horumara laga qaaday sida uu noo sheegay c/kariin Cali Abokor oo waxaa lagu soo kordhiyey dhir badan oo ay ka mid yihiin Babaay, Liin dhawr jaad ah Seytuun (Jawaafa), waxa kale oo ay ku beereen noocyo kala duwan oo digrta ka mid ah oo ay ku jirto digirta cad dadka qaarkoodna ay Faasuuliyaha ka dhigtaan, taas oo uu sheegay inay si aad ah ula dheceen dadkii tijaabiyey waxana xooga ay saareen inay soo saaraan tiro Badan.
"Digirtan waxa ay kaga duwan tahay ta kale waa geed weyn waxana ay beeraataa 4 sano inta badana waa dhalaysaa oo waa la manaafacaadsanayaa” ayuu yidhi C/kariin.

 

Beertan waxaa kaloo haatan 4jir ku gaadhey geedka canbaha oo si hanaqaad ah u baxay waxa la filayaa in uu sii beeraado intaas in leeg gaadhana markaa xiligii manaafacaadsiga, waxana dhirta ku beeran gaadhayaan ilaa 150 geed oo da’doodu kala duwan tahay.
Timir ayaa dhowaan lagu beeray oo haatan ilaa afar bilood beerayd sida uu C/kariin noo sheegay waxana ay qayb ka ahayd mashruuc dalka timirta lagu fidinayey waxana ay sheegeen in afar sano ay ku dhasho.
Geedaha indhayga soo jiitey ee beertaas ku yaaley ayaa waxaa ka mid ahaa mid naloogu sheegay inuu yahay cilaan ka la marsado "waan tijaabiney oo dad badan ayaa isticmaalay waxana uu noola muuqdaa mid lagu guulaystey haatan sidii loo fidin lahaa ayaan gelaynaa” ayuu yidhi C/kariin Cali Abokor.

Dhibaatooyinka ka hor yimi
Waqtigii hawlaha aasaaska beeraha lagu taagnaa tanaadintiisa dhibaatooyin badan ayaa ka hor yimi sida uu C/kariin sheegay oo ay ka mid ahaayeen biyo la’aan xoogleh oo waxay nagu qasabtay buu yidhi inaan berkedo badan u samayno.
Illaa hada waxaan ku waraabinaa Booyad waqtiga roobka maahaane, waxaana gala kharsh badan, waxase haatan meel 300m. noo jirta laga qoday riig biyood waxaana ku jiraa sidii aan uga guuri lahayn dhibaatadii biyo la’aanta ee waxbadan dib noo dhigtay,
Xanuuno dalagyada asiiba ayaa ah dhibaatada ugu baaxada badan ee markasta soo noqnoqda, hoos u dhac ku yimaada taranta iyo waxyaabo badan oo cayayaan iyo xayawaan caanaqubtu ka mid tahay oo dalagyo badan aan u awoodi weyney inaanu beero ayaa jira ayuu yidhi mulkiilaha beertan aan booqanay ee Ceegaag.
Waxsoosaarka
Waxsoosaarka dhawr beerood waxaa laga fuud yeelaa magaaladda Ceegaag oo ah ta loo sameeyey inay kaga maarmaan doonashada dalagyada daruuriga ah, wixii dheerna waxaa loo iib geeyaa magaalooyinka Buuhoodle, Laascaanood iyo mararka qaarkood oo Garoowe loo sii gudbiyo.
Baahiya lagama maarmaanka ah
Dadkan iskood isu xilqaamay jiidhayna baadhi kambaniyo waaweyn lacag badan ku bixin lahaayeen ayaan la odhan karin kamiintii way dhigeen waxaana laga yaabaa hadii la xisaabiyo baahida beerta iyo waxsoosaarkeedu inay isgoostaan oo aan faa’iido laga helin ama mararka roob yaraani jirto qasaare baaxad leh ay galaan.
Khasaaraha badanaa marka la weydiiyo dadka aqoonta u leh beera oo aan qaarkood kala sheekaystay tusayna dalagyada ayaa waxay sheegayaan in khasaaraha ku imaanayaa uu kow ka yahay aqoonta cilmiga beeraha oo barbaariya kobciya kicya islamarkaana kamiintira waxsoosaar beereedka, ta labaad ayaa ah ilaalinta midhaha oo leh cadow badan, ta sadexaadna waxay ku sheegeen isu dheelitirka ciida iyo waxa laga beerayo.
C/kariin Cali Abokor oo aan weydiiyey in ay marna keeneen goobta aqoonyahan beereed ayaa ii sheegay inaanay taasi dhicin ee ay iyagu caqli ahaan wixii ay la noqoto ay ku dhaqaaqaan Illaahayna talo saartaan.

Baaq iyo Gabagabo
Ugu danbaytii degaanka Ceegaag oo ah degaan xoolo dhaqato haatan la ogaadey masno dhulbeereedka ku haboon ayaa waxa dadka degaankaasi ee horusocodka jecel u baahan yihiin gacan siin taas oo noqonaysa mid kabid iyo mid talo ama aqooneed labadaba.
Qaar ka mid ah waxgaradka degaankaas oo uu ugu horeeyo Chief Caaqil C/laahi Cali Abokor ayaa balan qaaday inay soo dhowaynayaan cid kasta oo wax ku soo biirinaysa degaanka Ceegaag ama isku deyeysa inay maalgashadaan.
Si kastaba ha ahaatee beeraleydan ayaa waxa ay ka cudurdaarteen muuqaalka beeraha oo xiligan fiicnayn maadaama haatan kaliil dherer dhulka qiiq ka kacaayo oo dhirtuna cawlan tahay aanay ahayn waqtigii ugu haboonaa booqasho waxaanse isku deyi doonaa hadii Alle idmo xili roobaadkana inaan dib u milicsan doono.