Ciidamada ammaanka ayaa gacanta ku dhigay nin dhallinyaro ah maanta isku dayey inuu dab qabadsiiyo Masaajid ku yaalla Suuqa Idaacadda, gaar ahaan qaybta dhismaha Xisbiga ee Caanaha u gaarka ah.

Ninkan dhallinyarada ah ayaa Ragcaddii u dambaysay ee Salaaddii Duhur ee maanta dhinac walba Masaajidka kaga rusheeyay Gaas, hasa-yeeshee markii uu gudaha Masaajidka la galay Gaastaasi ayaa dadkii Tukanayey ka baxeen Salaadda isla-markaana gacanta ku dhigeen.

Xilliga la qabtey ninkan waxa dad goob-joogayaal ahi sheegeen inuu gacanta ku hayey Birikayga Sigaarka lagu shido oo uu doonayey inuu ku holciyo gaastii uu Masaajidka ku wareejiyey "Ragcaddii u dambeysay ee Salaadda ayaa lagu jiray. Dadku markii ay is-hayn kari waayeen ayay ka baxeen oo qabteen, isagoo markaa doonaya inuu Buluukeedka ku shido meeshii uu Baatroolkii ku Shubay” sidaa waxa sheegay qof goob-joogayaal ah.

Ilaa hadda lama oga ujeeddada dhabta ah ee ninkaasi ugu kacay falkaasi naxdinta leh, laakiin waxa dad aqoon u lahaa ninkaasi tilmaameen inuu muddo dheer kabaha ku baalashaynayey Masaajidka meel ku dhow. Booliska ayaa baadhaya kiiskan naxdinta leh ee ninkaasi ku kacay. 

Contact@afkashacabka.com