Waa qaybtii labaad ee gabayga Dardaaran: Gabay baroor-diiq ah oo maamuus iyo duco u ah Marxuum Maxamed Xaaji Ibraahin Cigaal.

Waa qaybtii labaad ee gabayga Dardaaran: Gabay baroor-diiq ah oo maamuus iyo duco u ah Marxuum Maxamed Xaaji Ibraahin Cigaal.

Doc-wareenka ceebtiyo af-xumo, daadifada uunka

Kama dixindixoon jirin markay, kula dullaamaane

Dulqaadkuu bulshada kula socdaan, abid i deyneyne

 

Nin u daran, dedaalna ugu jira, dabin u qoolkiisa

Isagoon dareensiin inuu, daaqsin ka horreeyo

Siduu darabta ugu loogi jiraan, abid i deyneyne

 

Nimuu daajiyaba maalintuu, dib ugu soo jeesto

Sidii dawri aar weyn markuu, daallabahaw muujo

 

Daymadii libaaxuu lahaa baan, abid i deyneyne

 

Duca-qabe, duullaan badheedh, dawladiyo kooxo

Colba halkuu ka soo degay markuu, diiradda u saaro

Difaacuu ku wada quusin jiraan, abid i deynayne

 

Dacwad murugtay, dood iyo odhaah, rag isu dooyaystay

Ninba doc uu ka qaadaba markay, diillintu
adkaato

 

Xikmaddiisi lagu diirsan jiraan, abid i deyneyne

 

Khudbad loo diyaar yahay markuu, hadalka deeqsiiyo

Diiwaanka waayaha markuu, daaha uga feydo

Daliilkuu soo qaadan jiraan, abid i deyneyne

 

Difil sabiya doobnimo kiyoo, madaxu deeb yeeshay

Kiyoo dibadda joogiyo kiyoo, jeelka lagu duubay

Cilmi siduu u daalibi jiraan, abid i deyneyne

 

Hadal debecsan, deex iyo tixgelin, deeqsinnimo taama

Madhnaan ruux dul tegay muu la noqon, duugga abidkiiye

Siduu diinta ugu hiilin jiraan, abid i deyneyne

 

Cid kastaba in deecaan la odhan, mawdka dacartiisa

Naftuun baa diddee taas marnaba, igama daahnayne

Dambaabna uma jeedee haddii, Deelku ila baydho

Adigaa dulqaad lehe Rabboow, daymo naxariis leh

Isagana ducaa nala gudboon, inan u deeqnaaye

Debno iyo quluub wada jiraan, ugu diraynaaye

Inuu Daayinku innaga aqbalo, degelka soo jeedsha

 

Inta shay dareenlee socdiyo, daafidiyo jayga

Daar iyo waxaa geed qotoma, ama duqaar jiifta

Qudhaanjada dareertiyo intii, garab leh ee duusha

Naxariis dareemada ka badan, doogga iyo ciidda

Inta Sheekh Quraankuun dersaa, dunida sii joogo

Ama subaxa ruux daakiraa, duubyada u maydho

Cisi ugu diyaafadi adaa, deeq u saaxiiba’e

Annagana intii lagu daree, Nebiga daaweysta

Ee aan dariiqada ka lumin, Daayiwom naga dhig

Belaayada Rabboow naga dabbaal, lala digleynaayo

 

Afartaa ma deelqaafinnine, daw ma qabadsiiyay

Ma daleeyay caawana mid kale, damac ma ii fuulay

Dabuub kalena waa xaajo aan, idin dareensiiyay

 

Nin dardaarmay wuxu kaaga tegay, daarta aad dhaxashay

Ma duugoobo abidkii haddaan, la iska daayicine

Waa daawo Somaliland, deyrka uu dhigaye

Ninna kama dabbaasheen asoon, dawga sii jiline

Dabkuu xidhay wataa hawl-yaraan, loogu daaddegaye

Duqayduna siday ugu dhaqmeen, waan ku diirsadaye

Shir degdega markii lagu kulmay, wax iga duuleene

Kolkaasay dadweynii rajacay, dib u fadhiisteene

Durba filannay yididdiiladii, durugtay yawmkaase

 

Kolba kii dumaalaa bulshada, daadahshoo haga’e

Isu soo du’ yaan maatida ayaan, duurka qaar xuline

Kayntana dugaaggaa ku badan, booba duunyada’e

Duhurkay biniin iyo dhurwaa, maqasha diirtaane

Kamballada ha daaqdiyo sabada, dayr-horka lahayde

Dib u waabi yay kuula gelin, dur iyo jiifaaye

Okholaha daloolaa biyaha, kuuma soo daro’e

Mid dudubiya oo aan hambayn, doobbi ha u dhiibin

Dul-wajeynka cayn-raacayaan, kaaga digayaaye

Ha degdegine fiiro u lahaw, xaajadii dalab leh

Waddankana difaac calanka yaan, daad u soo geline

Meeshii dalleenaba ka yacay, labada doolloodba

Dadku wayska caayaan nin anay, Daahiroow arage

Dul u yeelo, deelqaafku waa, shay dabiiciya’e

 

Mid kalena dadkaan odhanayaa, dawlad iyo shicibe

Dal hadduu ammaan la hadhsadiyo, kala-dambayn waayo

Daruuruhu hadday lacag noqdaan, dux uma yeeshaane

Dubaaq lagu midoobaa xornimo, lagu dakeeyaaye

Damcad malaha raaxadu hadday, col is-danqaabaane

Alle ha idin daayee carrada, daafta ka ilaasha

Nin walowba dacalkaaga qabo, yaanay daaddegine