Munaasibad ay inta badan Labeenta Bulshada Somaliland, gaar ahaan Hargeysa iyo Qurbo-joogga ku sugan laftooda, koobsatay oo ahayd Xaflad Meher, ayaa Marwada ay is-calmadeen loogu meheriyey Maayer Ku-xigeenka Caasimadda Hargeysa, kaasoo uu garab-fadhiyey Duqa Caasimaddu.

Maayer Ku-xigeenka Caasimadda Hargeysa ahna Guddoomiye Ku-xigeenka Golaha Deegaanka Hargeysa Cabdicasiis Maxamed Xaashi (Ina-Cagaweyne), ayaa maanta oo Jimce ahayd u fadhiistay Dhool Maxamed Cabdi, oo lagu siiyey, isla markaana loogu Meheriyey Munaasibaddaas oo maanta lagu qabtay Huteel Ambassador ee magaalada Hargeysa.

Waxaa Munaasibaddaas ka qaybgalay Xubno badan oo ka tirsan Golah Wasiirrada Xukuumadda Siilaanyo, Masuuliyiinta Xisbiyada Qaranka, Shir-guddoonka Golayaasha Guurtida iyo Wakiillada Somaliland, Madaxda Dhaqanka Somaliland, Culimo-aw-diin, Qurbo-joogga dalka ama Caasimadda ku sugan qaarkood, Fannaaniin, Abwaaniin, Dhalinyaro, Siyaasiyiin, Aqoonyahaniin, Odayaal, Wax-garad iyo Marti-sharaf kale oo tiro badan.

Waxaanannu halkan idiinku soo gudbinaynaa Sawirrada Munaasibaddaas la isku arkay ee Meherka Maayer Ku-xigeenka Caasimadda Hargeysa ee Daawasho Habboon.

Waxaannu leenahay Gacal iyo Sokeeyaba Guurkiinna Lagu Farax….Guurkiinnu Guur Khayr, Gurigiinna Guri Nagi Guulluhu ka yeel. Noqda kuwii Aqal-galkooda ku gaadha, Nabad, Bash-bash, Barwaaqo, Farxad iyo Raynrayn, isku raaga ee Ubad khayr qaba kala hela. Aammiin…..Aammiin……Aammiin.