Dalkii maanigaa ku hadhay !!!!!! Qalinkii: Jamaal Cabdiraxmaan Bullaale
0 - Visits: 1850
-
- Share
Waa ayaamo isu kaa dhiibaya. Waa toddobaado jimcayaal keliya ku suntan. Waa sannado soconaya. Waa adduun aan waxba la inaga waydiinayn. Waa arrimo la wada jecelyahay se waayuhu diiday.
qof walba dantiisa ayaa hoggaan ku xidhatay. maalin la isma odhan tan ayaa iman doonta .
Waxa ay ahaayeen maalmo bilicsan. waagii beryaa waxa uu noo ahaa arooryo sareedo, ma aannu sugi
jirin inta ay qorraxda arooryaad soo baxayso,waxa aannu ahayn kacaan isku wada da, ah, waxaanu iskaga
mid ahayn dherer iyo dhaad ba,. Waxa ay noloshu nala ahayd dheel-dheel iyo rayn-rayn, weligayo
ismaannu odhan maalin ayaad iswaayi doontaan. waxa aan badankayagu joognay guryo nalaga
jecelyahay, wixii aannu u baahanno si fudud ayaan u helnaa, lama hayo ma oggolin.
Waagaas ma jiraan idaacado, muuq-baahiyayaal , waxa keliya aannu isku maaweelinna waa afkayaga,
marka ay fiidkii gaadho ayaa golaha la iskugu yimaaddaa, waa deeq oo codkiisa macaan heesahii
qaraamiga ku qaada, waa kayse oo ku af-bartay sheeko xariirada iyo maaweelada caruurta, waa
axmedqani oo ka sheekeeya sheekooyinka qosolka&maadda.
Waa la wada koray, qof walba waxa uu beddelay hab-fekerkiisii hore, waxa la wada bilaabay
waxbarasho, waxa la is wada qoray dugsiyo iyo malcaamad-quraanno kala duwan. Goorta la is arkaa waa
labada maalmood ee khamiista iyo jimcaha oo fasax la yahay, saaxiibbaday waxa aannu isku dugsi ka
noqonnay saddex arday. Waxa jiray dhalin badan oo iyagu shaqo bilaabay, waxa kale oo jiray koox iyagu
ka dhacay nolosha iyaga oo waayay cid daryeesha .
Waa hadhuub carruurnimo,
Guntu ay habaysee
Goormaan hambaabirey?
Isbeddel waa uu yimid balse wax sidaas u weyni ma ay isbeddelin, waxa aannu ula falgalnay noloshan
cusub si togan, waxa bilawday in aragtidii hore ee nolosha aannu ka lahayn ay is beddeshay, waxa aannu
garawsannay in aanay noloshu sidan aahanayn, in mas,uuliyadi imanayso ayaan garanay.
Waxa aannu ku guulaysanay in aannu kubbadii sii wadno si aannu isugu mashquulinno labada maalmood
ee fasaxa aan nahay, waxa aan abuurnay koox kubada cagta ah, kooxdaasi waxay noqotay mid guulo
badan soo hoysa, guulahaasi waxa ay noqdeen kuwo nagu dhiiri-geliya in aan kooxda sii hormarino .
Iyadoo ay noloshu meeshaas nala marayso, haddana looma wada dhammayn sii socoshada kooxda, taasna
waxa u sabab ahaa iyada oo ay yarayd rajada laga qabay in kubbada mustaqbal laga dhigtaa maadaama
aanay jirin horumarin iyo maalgashi dawladeed. Waxa sii kordhayay xubnaha naga siibanayay, waxa
bilaabmay xilligii walaahawga, dhallinyaranimo iyo xarrago ayaa loo tafo-xaytay, kuwo badan ayaa
maskaxda geliyay guur, kuwo kale ayaa ay la dheeraatay waxbarashadii, sidaasna kaga baxay iyaga oo
daba orday lacag dhaw se aan maamuus iyo mansab midna lahayn.
Wixii rag u kaco rabbina aqbalo, way rumoobaane, muddo ka dib waxa aannu ardaa u xidhnay jaamac
guux, waxa uu la aqal galay bilcaan uu muddo jacayl dhex miranayay, maalmo ka dib waxa uu sahal
furtay dukaan wayn, cabdilaahi waxa galay hammi dhoof, muddo kadib waxa uu aabihii uga yeedhay
safaaradda maraykanka ee ADDIS ABABA, aniga, axmed qani iyo cabdalle waxa aannu u luudnaa
dhankii dugsiga, waxa yaraaday dadkii aannu wada kacnay ee aa xaafada nagula soo hadhay, kuwii
guursaday waxa ay ka badin waayeen hawlahoodii, in la is arkaa waxa ay noqotay mid adag, in la kulmaa
oo la wada sheekaystaana ma aha mid suura-gal ah, xaafaddii dhalinta la ciirciiraysay waxa ay noqotay
mid gabaahiir ah, dadkii aan aqaannay ayaa gabaabsi noqday, noloshii ayaa adkaatay, xaaladdi wadanku
waxa ay noqotay mid aan ka soo raynayn, ma jirin waxbarasho iyo shaqo sidaas u badani .
Markii ay in muddo ah sidaas ahaatoba, waxa wadanka kusoo kordhay qalabka isgaadhsiinta ee casriga
ah, waxa ay isbeddel ku keentay wacyigii dhalinta, waxa dhalinyaradii u furmay daaqad ay dhiggoda
dunida iska arkaan.
Waxa bilaabmay in wadanka ay dibedda uga baxaan dad badani, waxa dhalinyaro badani u hayaantay
dhanka wadanka sucuudiga iyaga oo u xoogsi tegaya, muddo ka dib waxa bilaabmay in dhanka yurub dad
badan u hayaamaan, waxa sii kordhay hiyi-kaca dhalinta, markasta oo qof aad garanaysaa uu galo
wadanka ITALY waxa ku gelaya hammi socod.
Waxa maalin walba ka dhalandhoolayay degmada aan ku noolaa dad badan oo aan isku fasal ahayn, waxa
ay ahaayeen dad aan is garanayno dhammaantood, asxaabtii, ehelkii aan xaafadda ku wada kornay in yar
ayaa ka joogta. magaalo dhan ayaa wada dhaqaaqday. Waxa ay qorraxdu ii dhacday maalintii uu
Axmedqani ka tegay Magaalada, maalintaa uu boggiisa kasoo jaray inuu dalka ka baxo, saddeex sano ka
dibna waxa iga qarsoomay xiddigii u dambeeyay; Cadnaan ayaa tahriibay maalin kadib markuu dugsiga
sare ka baxay.
Saaxiib anigu halkan kuma sii noolaan karo e nasiib wanaagsan ayaan ku rajaynayaa, anigana iisoo ducee;
waa erayadii u dambeeyay ee aan cadnaan ku kala hulleelnay .waxa uu qaadayey heestii axmed cali cigaal
ee ahayd :-
"Sawtii nebigu uu yidhi,
Haddaad nolosha qawadaan,
Nabada gala,e haajira,
Wixii nool adduunyada,
Waa laysu soo noqon,
Dhulka oo naruuro ah
Roobkuna ku nuuxsaday.”
Hebel iyo hebel ayaa Italy iyo germany jooga waad maqlaysaa, waxa kale oo aad maqalaysaa in saaxiib
wiil aad ahaydeen, gabadh qurux u dhalatay oo aad jaar ahaydeen labadaba ay baddu liqday.
Waxa isku soo hadhnay aniga iyo dantaydii, waxa aan wehel ka dhigtay buug iyo qalin, waxa aan
niyadayda geliyay in aanan wadanka ka tegin waxkasta oo dhaca, waxa aan ka joogaa konton wiil oo hal
xaafad ku wada kacaamay, boqolaal wiil ooh al degmo ku wada noolaa iyo kumanaan dhalinyaro ah oo
hal waddan ku wada noolaa.
Hillaacii "dam” yidhi baa
Hiyigayga qaadee,
Maalmihii hulleeliyo
Dhallaannimo hufnaydaa!
Gaarriye, dhallaanimo
Waxa aan ku ceceliyaa tixdan yar oo aanan garaneyn goorta ay iga soo maaxatay
"Dadkii maanigaa ka hadhay,
Dalkii maanigaa ku hadhay,
Dariiqbaa noo furmoo,
Dadkii wada qaadayaa,
Duunyaa loo roorayaa,
Damiirkiibaa dhintoo,
Dalkii dadku uu lahaa,
Duunyaa laga doortayoo,
Dalbaa laga aaday kale,
Curintii: Jamaal Cabdiraxmaan Bullaale
jbullaale@gmail.com
Burco, Somaliland
Dalkii maanigaa ku hadhay !!!!!! Qalinkii: Jamaal Cabdiraxmaan Bullaale
Waa ayaamo isu kaa dhiibaya. Waa toddobaado jimcayaal keliya ku suntan. Waa sannado soconaya. Waa adduun aan waxba la inaga waydiinayn. Waa arrimo la wada jecelyahay se waayuhu diiday.