Neymar Junior iyo Edinson Cavani ayaa u muuqday xalayto kuwa isku qasbaday mar kale rigoore loo dhigay kooxdooda intii ay socotay ciyaartii ay 2-0 kaga badiyeen kooxdaTroyes, waxeyna kusoo aadeysaa xilli Thiago Silva uu shaki galiyay in saaxiibkiisa Neymar uu yahay rigoore tuuraha rasmiga ah ee kooxda.

Weeraryahanka reer Uruguay Edinson Cavani ayaa lagu riday ganaaxa intii ay socotay ciyaarta taasoo keentay in garsooraha uu tilmaamo rigoore, labaduba waxey hamiyeen iney tuuraan si ay uga faa’iideeyaan kooxdoosa, balse ugu dambeyntii Cavani ayaa ka biyo diiday inuu Neymar siiyo.

Kaamirooyinka ayaa soo qabtay labadooda oo wada hadlaya, inkastoo aysan si weyn isugu qabsan arinta, hadana Cavani wuxuu qasaariyay markii labaad oo ay rigoorada kooxdiisa muran gasho sidii dhacday kulankii Lyon ee September.

Goolhayaha TroyesMamadou Samassa, ayaa si cajiib ah kaga badbaadiyay Cavani gool ku laad-kii loo dhigay kooxdiisa, balse nasiib wanaag waxey gaareen guul muhiim ah.

Sida warbaahinta ay tabinayaan xiriirka labada xidig ayaa soo wanaagsananayay, xalaytana uma muuqan sidii dhacday kulankii ay 2-0 kaga badiyeen Lyon markaas oo ay xitaa isku qabasadeen laad xor ah.

Dhanka kale Neymar Junior ayaa si aan caadi aheyn ula dagaal dagay saaxiibkiisa Edinson Cavani markii uu dhaliyay goolka labaad taasoo yareysay hadal heynta rigooradii xalayto.